क्रिकेट खेलाडी झोला प्याक गरेर बसेका छन्, तर युएईको भिसा आएन

वेष्ट इन्डिजसँगको सिरिज खेल्न नेपाली क्रिकेट खेलाडी शुक्रबार युएई जाने तयारीमा थिए । 

नेपाल क्रिकेट संघ (क्यान) ले बिहीबार नै उनीहरुको बिदाइ गरिसकेको थियो । खेलाडीहरुले पनि झोला प्याक गरेर युएई जान तयारी गरिसकेका थिए । तर शुक्रबार बिहानसम्म खेलाडीहरुको भिसा नै आएन । 

युनाइटेड अरब इमिरेट्सले भिसा नदिएपछि खेलाडीहरु रोकिएका छन् । नेपालले असोज ११, १३ र १४ गते युएईको सारजहामा वेष्ट इन्डिजसँग तीन खेलको टी–२० सिरिज खेल्ने तय भएको छ । त्यही सिरिजका लागि नेपालीहरु युएई जान लागेका हुन् । 

नेपाल क्रिकेट संघ (क्यान) का अनुसार ३/४ दिनअघि नै युएईको नेपालस्थित दूतावासमा भिसा आवेदन दिएको थियो । यसअघि प्राय १ दिन अगाडि नै भिसा आइसकेको हुन्थ्यो । तर यसपटक आएन । 

जेनजी आन्दोलनपछि युएईले नेपालीहरुलाई भिसा दिएको छैन । त्यसैले खेलाडीहरुको भिसा पनि नआएको हो । नेपाल क्रिकेट संघले खेलाडीहरुको भिसाका लागि सहजीकरण गरिदिन अन्तर्राष्ट्रिय क्रिकेट काउन्सिल (आईसीसी) लाई आग्रह गरेको छ ।