‘रास्वपामा रविको विकल्प छैन’

७ असोज, काठमाडौं । जेनजी आन्दोलनसँगै राष्ट्रिय स्वतन्त्र पार्टी (रास्वपा)मा हलचल आएको छ । पूर्वमन्त्री सुमना श्रेष्ठले पार्टी परित्याग गरिन् भने केही नेताहरु असन्तुष्ट छन् । तल्लो कमिटीहरुमा पनि नेतृत्वको विकल्प खोज्नुपर्ने मत उठ्न थालेको छ । 

यसबारे छलफल गर्न मंगलबारदेखि केन्द्रीय समितिको बैठक सुरु भएको छ । जहाँ ५ वटा (कर्णाली र गण्डकी बाहेक) प्रदेशका सभापतिहरु समेत सहभागी छन् । तर बैठकमै सुरुमा नै नेताहरुले रविको विकल्प नभएको बताएका छन् । 

बैठक चलिरहेकै बेला प्रदेश सभापतिहरुलाई पत्रकारमाझ प्रस्तुत गरियो । यहाँ एकपछि अर्को सभापतिले रवि लामिछानेको विकल्प नभएको बताए ।

बागमती प्रदेशसभा सभापति डा. अच्युतम लामिछानेले सभापति लामिछानेप्रति आफूहरुको विश्वास रहेको बताए । ‘हाम्रो विश्वास, ऐक्यवद्धता र रास्वपा र रवि लामिछनमोमाथि छ’ उनले भने ।  

मधेश प्रदेशका सभापति तपेश्वर यादवले पनि सभापतिप्रति पूर्ण विश्वास रहेको बताए । अघिल्लो सरकारले झुटा मुद्दा लागेको भन्दै उनले चुनाव घोषणा भइससकेको अवस्थामा यो विषय छिटो टुंगो लगाइदिन सरकारसँग आग्रह गरे । 

कोशीका कार्यबाहक सभापति सरिन तामाङ र लुम्बिनीका देवराज पाठकले पनि सभापति रविको विकल्प नसोचेका र न खोजेको बताए ।

सुदूरपश्चिम प्रदेश सभापति प्रकाश विष्टले अगाडि भने, सभापतिको विकल्प छैन । हाम्रो सभापति रवि लामिछाने नै हुनुहुन्छ ।’