काठमाडौंको सीडीओ हटाइए, पौडेलले पाए जिम्मा

काठमाडौं । सरकारले काठमाडौंको प्रमुख जिल्ला अधिकारी फेरेको छ । हाल प्रमुख जिल्ला अधिकारी रहेका छवी रिजाललाई मन्त्रालय फर्काइएको छ । 

उनको ठाउँमा ईश्वरराज पौडेललाई पठाइएको छ । उद्योग वाणिज्य तथा आपूर्ति मन्त्रालयबाट गृह ल्याएर पौडेललाई काठमाडौंको प्रमुख जिल्ला अधिकारीको जिम्मा दिइएको हो । 

पौडेल यसअघि ३३ किलो सुन तस्करी प्रकरणको जाँचबुझ तथा अनुसन्धान समितिका संयोजक भएर काम गरेका कर्मचारी हुन् ।

काठमाडौं महानगर पालिकामा तत्कालीन कार्यकारी अधिकृत भएर काम गरेका उनी कोलकातामा महावाणिज्य दूत भएर समेत काम गरेका थिए । 

हालका काठमाडौंका प्रमुख जिल्ला अधिकारी रिजाल एक महिना पनि काठमाडौंमा बस्न पाएनन् । उनी भदौ ४ मा मात्रै काठमाडौंको सीडीओ भएका थिए । 

तर, भदौ २३ गते भएको जेनजी आन्दोलनमा चरम दमन भएपछि उनी विवादमा परे । उनले गोली हान्ने आदेश दिएको भन्दै उनीमाथि चौतर्फी रुपमा प्रश्न उठेको थियो । 

त्यही दिन उनले कार्यालयको वेबसाइटबाट फोटो र फोन नम्बर हटाएका थिए ।

यस्तै उनले फेसबुक समेत डिएक्टिभेट गरेका थिए । भदौ २४ मा उनको घरमा समेत प्रदर्शनकारीले आगजनी गरेका थिए ।