अध्यादेशमार्फत संविधान संशोधन गरौं, प्रत्यक्ष निर्वाचित कार्यकारीको व्यवस्था गरौं : बाबुराम 

पूर्वप्रधानमन्त्री डा. बाबुराम भट्टराईले संविधान संशोधन गरेर प्रत्यक्ष निर्वाचित कार्यकारीको व्यवस्था गरेर मात्र चुनावमा जानुपर्ने बताएका छन् । 

बिहीबार काठमाडौंमा पत्रकार सम्मेलन गरेर उनले अहिलेकै व्यवस्था अनुसार चुनाव गराउँदा फेरि पुरानै शक्तिहरु आउने भन्दै त्यतिबेला जेनजी आन्दोलनको उपलब्धि गुम्ने जोखिम रहेको बताए । 

‘अहिले जुन प्रक्रियाले यो सरकार बनेको छ, त्यही प्रक्रियाबाट अध्यादेशमार्फत संविधानमा आवश्यक संशोधन गरेर प्रत्यक्ष निर्वाचित कार्यकारी प्रणालीको व्यवस्था गर्ने र निर्वाचनमा जाने । यति सुधार गर्न सकियो भने तपाईहरुको बलिदानको अर्थ रहन्छ, नभए घुमिफिरि रुम्जाटार हुन्छ’, उनले भने । 

क्रान्ति र परिवर्तनलाई निरन्तर दबाब दिएर अगाडि बढाउन नसकेमा आन्दोलनको रापताप सेलाउनेवित्तिकै फेरि देशभित्र र बाहिरका शक्ति खेल्न थाल्ने र उपलब्धी गुम्ने जोखिम हुने उनको भनाइ छ । 

अहिलेको सरकार जेनजी विद्रोहीप्रति प्रतिवद्ध हुनुपर्ने भन्दै भट्टराईले कुनै पनि बहानामा पुराना शक्तितिर ढल्किने काम सरकारले गर्न नहुने बताए । 

नेपाली कांग्रेस, नेकपा एमाले र माओवादीजस्ता पुराना दलहरु भ्रष्टीकरण भइसकेको भन्दै उनले ती पार्टीहरुलाई कुनै पनि बहानामा टाउको उठाउन दिन नहुने बताए । 

अब आउने चुनावमा बालेन, हर्कलगायत सबै वैकल्पिक शक्तिहरु एक ठाउँमा आउनुपर्ने भन्दै उनले एउटै पार्टीमा नअटाए पनि कम्तीमा मोर्चाबन्दी गर्नुपर्ने बताए । 

पुराना दलहरु पनि रुपान्तरणको सम्भावना नभएकाले दोस्रो र तेस्रो पुस्ताका नेताहरुले पार्टी छाडेर वैकल्पिक शक्तिलाई साथ दिनुपर्ने पनि उनले बताए । 

जेनजी आन्दोलनमा प्रत्यक्ष निर्वाचित कार्यकारीको नारा लागेकाले त्यो मुद्दा सम्बोधन गरेर मात्र चुनाव गनुपर्ने सरकारको दायित्व हुने भट्टराईले बताए ।

उनले बुधबार नेपाल समाजवमादी पार्टी (नयाँ शक्ति) को अध्यक्षबाट राजीनामा दिएका थिए । उनले दोस्रो र तेस्रो पुस्ताले ढोका ढकढक्याइसकेकाले आफूले पद ओगटेर बस्नु राम्रो नहुने भन्दै राजीनामा दिएको बताएका छन् ।