जेलबाट भागेका कैदी र लुटिएका हतियार दशैंको मुख्य सुरक्षा खतरा

दशैंका बेला उपत्यकामा शान्ति सुरक्षा कायम गर्न र चोरी नियन्त्रण गर्न प्रहरीले ६ हजार १०६ जना प्रहरी परिचालन गरेको छ । 

उपत्यका प्रहरी कार्यालयले बैंक तथा वित्तीय संस्थाको कार्यालय, सुनचाँदी पसल, आर्थिक कारोबार हुने अन्य स्थान, मठमन्दिर र पर्यटकीय स्थललाई प्राथमिकता दिएर प्रहरी परिचालन गरेको छ । 

दशैंका बेला धेरै मानिसहरु उपत्यकाबाहिर जाँदा चोरीको जोखिम रहने भएकाले रातिमा सादा पोशाकमा प्रहरी परिचालन गरिने उपत्यका प्रहरी कार्यालयका प्रवक्ता एसएसपी शेखर खनालले जानकारी दिए । 

भदौ २४ गते जेनजी आन्दोलनका क्रममा जेलबाट भागेका कैदीबन्दी दशैंका बेला सुरक्षा चुनौती रहेको प्रहरीको भनाइ छ । जेलबाट भागेकामध्ये करिब ६ हजार कैदीबन्दी अझै फरार छन् । प्रवक्ता खनालका अनुसार आन्दोलनमा प्रहरीबाट लुटिएका धेरै हतियार पनि अझै फिर्ता आएको छैन । 

त्यसैले यी दुई कारणले यस पटकको दशैंको समयमा सुरक्षा व्यवस्था मजबुत बनाउन आवश्यक रहेको प्रहरीको भनाइ छ । प्रहरीले आफ्नो गाउँ टोलमा जेलबाट भागेका कैदीबन्दी फेला परेमा खबर गर्न भनेको छ । त्यस्तै कसैले हतियार राखेको थाहा पाएमा पनि खबर गर्न आग्रह गरेको छ । 

‘नागरिकले आफू सुरक्षित रहन पनि प्रहरीलाई सहयोग गर्नुपर्छ’, एसएसपी खनालले भने । 

त्यस्तै बसपार्क, यात्रुहरु बस चढ्ने र ओर्लने ठाउँमा पनि प्रहरीहरु परिचालन गरिएको छ । दशैंका बेला यात्रुहरु ठगिने सम्भावना भएकाले अन द स्पट प्रहरीलाई खबर गर्न यस्ता ठाउँमा हेल्प डेस्क राखिएको छ ।