हर्क साम्पाङले खोले श्रम संस्कृति पार्टी, दर्ता गर्न निर्वाचन आयोगमा निवेदन

धरानका मेयर हर्क साम्पाङले राजनीतिक दल दर्ताका लागि निर्वाचन आयोगमा निवेदन दिएका छन् । असोज ६ गते साम्पाङले दल दर्ताका लागि निर्वाचन आयोगमा निवेदन दिएका हुन् । 

उनको निवेदनको दर्ता नम्बर ४७१ रहेको छ । पार्टीको नाम श्रम संस्कृति पार्टी रहेको छ र अध्यक्ष हर्क साम्पाङ छन् । केन्द्रीय समितिमा २२ जना रहेका छन् । पार्टीमा देवराज लामा विश्वक्रान्ति, आरेन राई लगायत रहेका छन् । चुनाव चिह्न माटोको ढिस्को राखिएको छ ।

निर्वाचन आयोगले साम्पाङको दल दर्ता निवेदन अध्ययन भइरहेको निर्वाचन आयोगका प्रवक्ता नारायण प्रसाद भट्टराईले जानकारी दिए ।  

धरान उपमहानगरपालिकाको मेयरमा स्वतन्त्र रुपमा जितेका साम्पाङ पछिल्लो केही महिनायता दल दर्ताको तयारीमा थिए । उनले देश विकासका लागि केही कानुन नै फेर्नुपर्ने  भन्दै स्थानीय तहको चुनाव जितेर मात्र देशको विकास गर्न नसकिने बताउँदै आएका थिए । 

पछिल्लो समय उनका समर्थकहरुले धरानसँगै काठमाडौं, पोखरालगायतका शहरमा टिम हर्क साम्पाङको नाममा सरसफाइ अभियान चलाइरहेका छन् । नेपाल बाहिर पनि विभिन्न देशमा नेपालीहरुले टिम हर्क साम्पाङ गठन गरेका छन् ।