एमालेले भन्यो : ओलीको राहदानी रोक्का प्रतिशोधपूर्ण

नेकपा एमालेले भदौ २३ र २४ गतेको घटना जाँचबुझ गर्न गठित आयोगले आफ्ना अध्यक्ष तथा पूर्वप्रधानमन्त्री केपी शर्मा ओलीको राहदानी रोक्का गर्न सिफारिस गरेकामा आपत्ति जनाएको छ । 

आइतबार ओलीको निवास गुण्डुमा बसेको बैठकले जाँचबुझ आयोगले दशैंको बेलामा गरेको यो निर्णय राजनीतिक प्रतिशोधपूर्ण रहेको ठहर गरेको छ । 

एमालेले यस्तो निर्णयले आयोगको विश्वसनीयतामा पनि प्रश्न खडा गरेको बताएको छ । 

एमालेले गृह मन्त्रालयले भदौ २४ गते भएको तोडफोड र आगजनीको घटना पनि जाँचबुझ आयोगको क्षेत्राधिकारभित्र पर्ने भनेकामा पनि आपत्ति जनाएको छ । मन्त्रालयले यो विषय आयोगको क्षेत्राधिकारभित्र पर्ने भन्दै तत्काल कुनै कारबाही अगाडि नबढाउन नेपाल प्रहरीलाई निर्देशन दिएको थियो । 

एमालेले यो निर्देशनले अपराध अनुसन्धान गर्ने नेपाल प्रहरीको कानुनसम्मत क्षेत्राधिकारमाथि हस्तक्षेप गरेको बताएको छ । ‘यसले अपराधीहरुको मनोबल बढाउने र उन्मुक्ति दिने आपत्तिजनक मनसायसमेत बोकेको छ’, एमाले सचिवालयको निर्णयमा भनिएको छ ।

एमालेले भदौ २३ र २४ को घटनाक्रमबारे छलफल गरेर निर्णय गर्न असोज २७ देखि २९ सम्म  काठमाडौंमा केन्द्रीय कमिटीको बैठक बोलाएको छ । त्यसअघि केन्द्रीय सचिवालयको अर्को बैठक असोज १९ र २० गते बस्ने उपमहासचिव प्रदीप ज्ञवालीले जानकारी दिएका छन् ।