माओवादीले चुनावमा सक्रियतापूर्वक भाग लिन्छ : प्रचण्ड

नेकपा माओवादी केन्द्रका संयोजक पुष्पकमल दाहाल प्रचण्डले आफ्नो दलले चुनावमा सक्रियतापूर्वक भाग लिने बताएका छन् ।

सोमबार पार्टीको सचिवालय बैठकपछि पत्रकारलाई प्रतिक्रिया दिँदै उनले घोषित मितिमा चुनाव हुनुपर्ने र सबै पार्टीले निर्वाचनमा भाग लिनुपर्ने बताएका छन् । 

‘घोषित मितिमा निर्वाचन हुनुपर्छ, सबै पार्टी निर्वाचनमा भाग लिनुपर्छ । हाम्रो पार्टी सक्रियतापूर्वक निर्वाचनमा भाग लिन्छ’, उनले भने । 

जेनजी आन्दोलनपछि गठित सरकारले प्रतिनिधिसभा विघटन गरेर फागुन २१ गते चुनाव तोकेको छ । माओवादी केन्द्रका नेता अग्निप्रसाद सापकोटाका अनुसार यो चुनाव सफल पार्न संसदमा भएका सबै पार्टीसँग छलफल भइरहेको छ । 

‘हाम्रो पार्टीले निर्वाचन घोषित मितिमा गर्न सकारात्मक वातावरण बनाउन नेतृत्वदायी भूमिका खेल्नेछ’, उनले भने । 

माओवादीले सोमबारको बैठकमा समाजवादी मोर्चा विस्तार गर्ने र विचार मिल्ने पार्टीहरुसँग एकता गर्ने विषयमा पनि छलफल गरेको छ । नेता सापकोटाका अनुसार यी विषयमा छलफल गर्न बुधबार पनि सचिवालय बैठक बोलाइएको छ ।