सञ्जालमा ‘एरेस्ट ओली’ अभियान, प्रहरीमा जाहेरी

२० असोज, काठमाडौं । पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकविरुद्ध जाहेरी लिएर हामी नेपालका संयोजक सुदन गुरुङ प्रहरी कहाँ पुगेका छन् । 

सोमबार मात्र सामाजिक सञ्जालमा ओली र लेखकलाई पक्राउ गर्न माग गर्दै अभियान चलाइएको थियो । जेनजी आन्दोलनको पहिलो दिन २३ भदौमा भएको बर्बर दमनमा तत्कालीन प्रधानमन्त्री ओली र लेखकलाई पक्राउ गरेर कानुनी कारबाही गर्नुपर्ने उनीहरुको माग छ ।

जेनजी अगुवाहरुले पोस्ट गरेपछि यो सामाजिक सञ्जालमा भाइरल नै बनेको छ ।

त्यसपछि सुदन आफैं जोहरी लिएर गएका हुन् । उनी सोमबार जिल्ला प्रहरी परिसर, काठमाडौं पुगेका थिए । तर उनको जाहेरी दर्ता भएको छैन ।

एक अधिकृतका अनुसार पूर्व न्यायाधीश गौरबहादुर कार्की नेतृत्वको जाँचबुझ आयोगले अनुसन्धान गरिरहेका बेला प्रहरीले जाहेरी दर्ता गर्ने सम्भावना छैन । 

जाँचबुझ आयोगले हालै मात्र ओली र लेखकसहित ५ जनाको पासपोर्ट रोक्का गर्न र आफ्नो अनुमति विना उपत्यका छाड्न नदिन सिफारिस गरेको थियो । आयोगको सिफारिसअनुसार गृहले अध्यागमन कार्यालयमा पत्रचार गरिसकेको छ ।