जाँचबुझ आयोगले भन्यो : फौजदारी कसुरमा संलग्नलाई कारबाही गर्न प्रतिवेदन कुर्न पर्दैन

भदौ २३ र २४ गतेको घटनासम्बन्धी जाँचबुझ आयोगले फौजदारी कसुरमा संलग्न जोकसैलाई पनि कारबाही गर्न सरकारले जाँचबुझ आयोगको प्रतिवेदन कुर्न नपर्ने प्रष्ट्याएको छ ।

यसअघि गृह मन्त्रालयले भदौ २३ र २४ गते भएको घटनाको विषय जाँचबुझ आयोगको क्षेत्राधिकारभित्र पर्ने भन्दै विज्ञप्ति निकालेको थियो ।

आयोगले मंगलबार विज्ञप्ति निकालेर फौजदारी मुद्दामा कारबाही गर्न आयोगको प्रतिवेदन कुर्न नपर्ने प्रष्ट्याएको हो ।

तत्कालिन सत्तारुढ दल एमालेका नेता कार्यकर्ताले भदौ २४ गते भएको निजी तथा सरकारी सम्पत्ति तोडफोड र आगजनीको घटनामा संलग्नलाई कारबाही गर्न माग गर्दै आएका छन् । 

त्यस्तै जेनजी प्रतिनिधि, भदौ २३ मा प्रहरीको गोली लागेर मृत्यु भएकाहरुको आफन्त र घाइतेहरुले तत्कालिन प्रधानमन्त्री केपी शर्मा ओली र तत्कालिन गृहमन्त्री रमेश लेखकमाथि प्रहरीले तत्काल कारबाही गर्नुपर्ने माग गरेका छन् ।