युवा संघलाई मोटरसाइकल र्‍याली गर्न रोक

जिल्ला प्रशासन कार्यालय काठमाडौंले एमालेको युवा संगठन राष्ट्रिय युवा संघलाई मोटरसाइकल र्‍याली गर्न स्वीकृति नदिने भएको छ ।

युवा संघले भोलि शनिबार मोटरसाइकल र्‍याली गर्ने तयारी गरेको थियो । बिहीबार गुण्डुमा भएको कार्यक्रममा एमाले नेता महेश बस्नेतले यसको घोषणा गरेका थिए ।

तर जिल्ला प्रशासन कार्यालय, काठमाडौंले स्वीकृति नदिने बताएको छ ।

प्रजिअ ईश्वरराज पौडेलका अनुसार फरक फरक समूहले मोटरसाइकल र्‍याली गर्ने सूचना आएको छ । यस्ता र्‍याली, जुलुस, धर्नाले सुरक्षा चुनौती बढाउन सक्ने भन्दै प्रशासनले स्वीकृति नदिने बताएको छ । 

युवा संघका प्रवक्ता निरोज पौडेलका अनुसार युवा संघले शनिबार काठमाडौंमा मोटरसाइकल र्‍यालीको आयोजना गरेको थियो । तीनकुनेबाट सुरु हुने र्‍याली माइतीघर त्रिपुरेश्वर, सुन्धारा, जमल, कृष्ण पाउरोटी,  गौशाला, एयरपोर्ट हुँदै पुनः तीनकुनेमै आएर पूरा हुँदै थियो । 

युवा संघले गरेको कार्यक्रममा एमालेका अरु जनसंगठन र पार्टीकै पनि सहभागी हुँदै थियो । जिल्ला प्रशासन कार्यालयले रोक लगाइदिएपछि के गर्ने भन्ने छलफल भइरहेको युवा संघका प्रवक्ता पौडेलले बताए । 

हेर्नुहोस् जिल्ला प्रशासन कार्यालयको सूचना