एमालेले मंसिर अन्तिम साता महाधिवेशन गर्ने

नेकपा एमालेले ११ औं महाधिवेशन मंसिरको अन्तिम साता हुने भएको छ । शुक्रबार र आइतबार बसेको एमालेको केन्द्रीय सचिवालय बैठकले मंसिरको अन्तिम साता महाधिवेशन गर्ने निर्णय गरेको उपमहासचिव प्रदीप ज्ञवालीले जानकारी दिए । 

उनका अनुसार महाधिवेशन हुने स्थान र मिति केन्द्रीय कमिटीले तोक्नेछ । एमालेको केन्द्रीय कमिटी बैठक असोज २९, ३० र ३१ गते बस्नेछ । 

एमालेको सचिवालय बैठकले प्रतिनिधिसभा विघटनलाई असंवैधानिक र अलोकतान्त्रिक ठहर गरेको छ । बैठकले प्रतिनिधिसभा विघटन बदर गर्दै पुनस्र्थापना हुनुपर्छ भन्ने माग गरेको ज्ञवालीले बताए । 

त्यस्तै अहिलेको सरकार निर्वाचनको कार्यादेशले गठन भए पनि सरकार निर्वाचनको बाटोमा नरहेको एमालेको निश्कर्ष छ । सरकार अहिले पनि निषेध, प्रतिशोध र मुठभेडको बाटोमा हिडिरहेको उपमहासचिव ज्ञवालीले बताए । 

‘सुरक्षाको उच्च जोखिम छ, त्यति नै बेला नेताहरुको सुरक्षा प्रबन्ध फिर्ता गरिएको छ । प्रहरीका हतियार लुट्ने, चौकी ध्वस्त बनाउने अपराधीलाई सप्रमाण गिरफ्तार गरेर ल्याउँदा गृहमन्त्रीको दबाबमा रिहा गरिएको छ । यसले सुरक्षा जोखिम बढाएको छ’, उनले भने । 

एमालेले राष्ट्रियता, लोकतन्त्र, संविधानका पक्षधर सबै राजनीतिक दल र नेपाली नागरिकलाई एकतावद्ध भएर अगाडि बढ्न अपिल गरेको छ ।