ओलीको चुनौती : नेतृत्व छाड्दिन, केन्द्रीय कमिटीबाट हटाएर देखाऊ 

नेकपा एमालेका अध्यक्ष केपी शर्मा ओलीले पार्टीको नेतृत्व नछोड्ने बताएका छन् । आफुले कुनै गल्ती नगरेको, भ्रष्टाचार नगरेको भन्दै उनले नेतृत्व नछोड्ने बताएका हुन् । 

बुधबार ललितपुरको भनिमण्डलस्थित एक पार्टी प्यालेसमा आयोजित पार्टीको केन्द्रीय कमिटी बैठकको उद्घाटन गर्दै उनले आफूलाई केन्द्रीय कमिटीबाट हटाउन चुनौती दिए । 

‘मैले हट्नुपर्छ कि पर्दैन फेसबुकले भन्ने होइन, यो कमिटीले हट्नुपर्छ भनेका बेला एकदम खुशी साथ हट्छु’, उनले भने । तर कोही नेताले अखबारबाजी गरेर लोकप्रियतावादको पछि कुदेर राजीनामा माग्दैमा नदिने पनि उनले बताए । 

पार्टीका कतिपय नेताले ‘तपाईलाई बोकेर जान सकिँदैन’ भनेको भन्दै ओलीले जवाफ दिए, ‘किन बोक्नुपर्‍यो म आफैं हिँड्छु ।’  

पार्टीका कतिपय नेताहरु विरोधीहरुको लहैलहैमा लागेर आफ्नो राजीनमा माग गरिरहेको ओलीले बताए । ‘हामीले भ्रष्टाचार गरेका छौं ?, अनैतिकता गरेका छौं कि ?, नराम्रो व्यवहार गरेका छौं ? भिजन छैन कि, काम गर्न सक्रिय छैन कि के भएर नराम्रो भयो’, उनले सोधे । 

कतिपयले केपी ओली अझै सप्रेको छैन भनेर टिप्पणी गरेको भन्दै ओलीले आफू बिग्रिदै नबिग्रेकाले सप्रिन नपर्ने जवाफ दिए । ‘बरु सिंहदरबार जलाउनेहरु सप्रिनुपर्‍यो’, उनले भने ।