प्रधानमन्त्रीको प्रष्टीकरण : कसैको दबाब र प्रभावमा गृहमन्त्री हटाइँदैन

बालेन शाहले गृहमन्त्री ओमप्रकाश अर्याललाई हटाउन दबाब दिएको खबर फैलिएपछि प्रधानमन्त्री सुशीला कार्कीले यसको खण्डन गरेकी छन् ।

बिहीबार उनको सचिवालयले एक विज्ञप्ति जारी गरी यस्ता खबरहरु भ्रमपूर्ण रहेको बताएको छ ।

‘कसैलाई कुनै मन्त्री बनाउने वा हटाउने विषय विशुद्ध सम्माननीय प्रधानमन्त्रीज्यूको अधिकार क्षेत्रको विषय हो । कसैको दबाब वा प्रभावमा यस्तो निर्णय हुन पनि सक्दैन’, कार्कीका प्रमुख स्वकीय सचिव आदर्शकुमार श्रेष्ठले विज्ञप्तिमा भनेका छन् । 

गृहमन्त्री अर्याल निर्वाचनको वातावरण बनाउन, शान्ति सुरक्षा कायम राख्न र सुरक्षा संगठनहरुको मनोबल उच्च राख्न अहोरात्र खटिएको पनि प्रधानमन्त्रीको सचिवालयले जनाएको छ ।

अहिले परिस्थिति संवेदनशील रहेको भन्दै विज्ञप्तिमा अफवाह नफैलाउन र नपत्याउन पनि आग्रह गरिएको छ ।