रास्वपा छाडेकै दिन सन्तोष परियारले गरे बाबुराम र जनार्दनसँग सहमति

सुमना श्रेष्ठपछि सन्तोष परियारले पनि राष्ट्रिय स्वतन्त्र पार्टी छाडेका छन् । 

उनले कात्तिक २८ गते महामन्त्री कविन्द्र बुर्लाकोटीलाई आफ्नो राजीनामा पत्र बुझाएका छन् । 

उनी रास्वपाबाट अहिले बिघटित प्रतिनिधिसभामा सांसद र प्रमुख सचेतक थिए भने पार्टीमा सचिवालय सदस्य थिए । 

उनले बदलिँदो परिस्थितिमा आफू फरक खालको राजनीतिक अभियानमा सक्रिय हुनुपर्ने भन्दै रास्वपाको साधारण सदस्य पनि नरहने गरी राजीनामा दिएका हुन् । 

जेनजी बिद्रोहले समकालीन नेपाली समाजको चेतना निर्माणमा निकै ठूलो भूमिका खेलेको भन्दै उनले यसलाई हरेक राजनीतिक पार्टी र व्यक्तिले नेपालको राजनीतिलाई फराकिलो हिसाबले सोच्नुपर्ने बताएका छन् । 

जेनजी विद्रोहलगत्तै नेतृ सुमना श्रेष्ठले रास्वपाले पार्टी भन्दा माथि व्यक्तिलाई राखेको भन्दै असन्तुष्टि जनाएर पार्टी छाडेकी थिइन् । 

सन्तोष परियारले पार्टी छाडेकै दिन बाबुराम भट्टराईको नेपाल समाजवादी पार्टी नयाँ शक्ति र माओवादी छाडेका जनार्दन शर्मा समूहसँग सहमति गरेका छन् । उनीहरुले एकीकृत पार्टीको नाम र चुनाव चिह्न एउटै बनाउने सहमति गरेका छन् । 

मंसिर ७ गते बृहत एकता घोषणा कार्यक्रम गर्ने पनि सहमति भएको छ । 

हेर्नुहोस् भिडियो