'चुनाव विथोल्न एमाले मधेशलाई रणभूमि बनाउन खोज्दैछ'

बाराको परवानीपुरमा पार्टी कार्यक्रममा जान लागेका नेकपा एमालेका महासचिव शंकर पोखरेल र नेता महेश बस्नेत बुधबार दिउँसो काठमाडौंस्थिति त्रिभुवन विमानस्थलबाटै फर्किए । 

सिमरामा जेनजी युवा र एमालेका कार्यकर्ताबीच झडप भएपछि स्थिति तनावग्रस्त बन्यो । सिमरा एयरपोर्टमा पनि तोडफोड भएपछि सिमराका विमानहरु बन्द गरिएका थिए भने सिमरामा कर्फ्यु पनि लगाइयो । त्यही कारण एमालेका नेताहरु परवानीपुरमा राखेको कार्यक्रममा सहभागी हुन पाएनन् । 

एमाले नेताहरु, अरु पार्टीका नेताहरु र नागरिकस्तरबाट पनि यो घटनाको विरोध भएको छ । जेनजी युवाहरुले निषेधको राजनीति गरेको, सरकारले पनि राजनीतिक दललाई भेला हुन र कार्यक्रम गर्ने वातावरण दिन नसकेको भनेर विरोध भएको छ । यस्ता घटनाले फागुन २१ गते हुने चुनाव बिथोल्ने त होइन भन्ने आशंका पनि बढेको छ । 

तर जेनजी मधेशले भने एमालेले जेनजीको कार्यक्रममा आक्रमण गरेपछि सिमराको स्थिति तनावग्रस्त भएको दावी गरेको छ । यसै सन्दर्भमा जेनजी मधेशका संयोजक शिव यादवसँग गरिएको कुराकानी : 

आज बारामा आफ्नो पार्टी कार्यक्रममा जान लागेका एमाले नेताहरुलाई जेनी युवाहरुले किन अवरोध गरेका ? 

आज सिमरामा जेनजीले नेकपा एमालेका नेता कार्यकर्तालाई अवरोध गरेको होइन, एमालेका कार्यकर्ताले चाहिँ जेनजीको कार्यक्रमलाई अवरोध गरेका हुन् । 

तर सिमरामा जेनजीको प्रदर्शनका कारण एमाले महासचिव शंकर पोखरेल र नेता महेश बस्नेत सिमरा जान सक्नुभएन नि ? 

किन सिमरा एयरपोर्ट तोडफोड भयो, किन प्लेन अवरुद्ध भयो भन्ने बुझ्न आज भएका घटनाक्रमलाई राम्ररी बुझ्नुपर्छ । सिमरा चोकमा जेनजी युवाले शान्तिपूर्ण कार्यक्रम राखेका थिए । एमालेले भने सिमरा चोकबाट २० किलोमिटर टाढा परवानीपुरमा कार्यक्रम राखेको थियो । 

तर सिमरा चोकको जेनजीले गरेको कार्यक्रममा एमालेका कार्यकर्ता आएर जेनजीका जिल्ला संयोजक लगायतका साथीहरुलाई कुटपिट थरे । कार्यक्रमका लागि जेनजी युवाहरु भेला हुँदै थिए, एक्कासी एमाले कार्यकर्ताले कुटपिट गरेपछि एयरपोर्टमा तोडफोड, ढुंगामुढा भयो । यसको दोषी एमाले हो, जेनजीले राखेको शान्तिपूर्ण कार्यक्रममा एमाले किन जानुपर्‍यो ? के जेनजीले परवानीपुरमा एमालेले राखेको कार्यक्रम बिथोलेको हो र ? त्यसैले जेनजीका कारण शंकर पोखरेल र महेश बसनेत सिमरा जान पाएनन् भन्नु गलत हो । 

आज एमाले नेताहरु सिमरा जाने दिन पारेर जेनजीले किन सिमरामै कार्यक्रम राखेको त ? 

यो हाम्रो पूर्वनिर्धारित कार्यक्रम थियो । एमालेको कार्यक्रम छ भनेर प्रतिरोध गर्न वा रोकावट गर्न राखेको होइन । जेनजीको माग पूरा गर्न, शान्तिपूर्ण निर्वाचनको लागि दबाब दिन हामीले देशभरि दबाबमूलक कार्यक्रम गरिरहेका छौं । त्यसै सिलसिलामा बारामा पनि कार्यक्रम राखेको हो । 

एमालेको कार्यक्रम सिमराबाट २० किलोमिटर टाढा परवानीपुरमा छ, एमालेका कार्यकर्ता सिमरामा किन आउनुपर्‍यो ? जेनजी साथीहरुले शान्तिपूर्ण कार्यक्रम गर्दा किन बिथोल्नुपर्‍यो ? 

तर आज एमाले नेताहरु जाने थाहा पाएरै जेनजीले अवरोध गर्न खोजेको भन्ने आरोप छ नि ? 

त्यो गलत भाष्य बनाउन खोजिएको छ, हामी प्रतिशोध र रोकतोकको राजनीति गर्दैनौं । सबै पार्टीका नेता कार्यकर्ता र नागरिकले निर्वाध रुपमा हिँडडुल र शान्तिपूर्ण कार्यक्रम गर्न पाइन्छ । तर एकले अर्कोको कार्यक्रममा गएर कुटपिट र गुण्डागर्दी गर्न पाइँदैन । तर आज चाहिँ जेनजी साथीहरु एमालेको कार्यक्रममा गएको होइन, हाम्रो कार्यक्रममा एमालेका कर्ताकर्ता आएका हुन् । 

नेकपा एमालेले मधेशमा तीन चारवटा घटना घटाइरहेको छ, यो घटनाले के देखाउँछ भने एमाले मधेशबाट अराजकताको राजनीति गरेर चुनाव भाँड्न खोज्दैछ । मधेशमा मुख्यमन्त्री नियुक्ति, होटलमा शपथ गराउनु, सभामुखले प्रदेशसभा सदस्यहरुलाई निष्कासन गर्ने काम यसका उदाहरण हुन् । 

आज एमाले नेताहरु सिमरा नगई फर्किँदा उनीहरुमाथि अवरोध भयो भन्ने हिसाबले अरु राजनीतिक दल र नागरिकस्तरबाट पनि विरोध भएको छ । यस्ता घटनाले निर्वाचन समयमा हुने वातावरण बन्छ त ? 

निर्वाचनको वातावरण बनाउन राजनीतिक दलहरु पनि संयम हुनुपर्छ नि, शान्तिपूर्ण कार्यक्रम गर्नुपर्छ नि, आफ्ना कार्यकर्तालाई सम्झाउनु बुझाउनुपर्छ नि । एमाले कार्यकर्ताहरु जेनजीको कार्यक्रममा नगएको भए आज बारामा शान्तिपूर्ण रुपमा दुबै कार्यक्रम हुन्थ्यो । 

चुनाव आइरहेको छ, एकै दिन एउटै जिल्लामा दशौं कार्यक्रम हुन सक्छन् । एमालेको कार्यक्रम छ भनेर जेनजीले कार्यक्रम गर्न नपाउने ? कांग्रेसले नपाउने ? अरु पार्टीले नपाउने भन्ने हुन्छ र ? 

नेकपा एमाले निर्वाचन हुन नदिने चलखेल गरिरहेको छ र जेनजी आन्दोलन कमजोर पार्न खोजिरहेको छ  । 

मधेशका केही घटना हेर्नु त एमालेले संविधान मिचेर कस्ता गतिविधि गरिरहेको छ । यसले के देखाउँछ भने यो सरकारलाई असफल पार्ने, निर्वाचन असफल पार्ने र निर्वाचनको मिति सार्न एमालेले लागिरहेको छ । 

जेनजी आन्दोलनका बेला एमाले नेतृत्वमा सरकार थियो । त्यसैले आन्दोलनकारी शक्ति अहिले पनि एमाले अध्यक्ष तथा पूर्वप्रधानमन्त्री केपी शर्मा ओलीलाई कारबाही हुनुपर्छ भन्ने पक्षमा छ । त्यसैको प्रतिक्रियास्वरुप एमालेमाथि अवरोध भएको त होइन ? 

जेनजी आन्दोलनपछि एमाले अध्यक्ष केपी शर्मा ओली र नेता महेश बस्नेतले कस्ता अभिव्यक्ति दिइरहेका छन् ? उनीहरुले राजनीति गर्ने व्यक्तिले देखाउनुपर्ने संस्कार देखाउनुभएको छ ? उहाँहरुको भाषाशैली कस्तो छ ?

त्यही कारण देशभर चुनाव हुँदैन कि भन्ने आशंका छ, यसको जिम्मेवार ओली र महेश बस्नेत हुन् । 

आर्मीको सुरक्षाबाट गुण्डु फर्केदेखि नै ओलीले सरकारलाई मान्दिन, हा हु को सरकार भन्दै आएका छन् । ७५ जना शहीद हुँदा यो आन्दोलनलाई अपमान गर्ने भाषा बोलिरहेका छन् । 

संविधान बमोजिम गठन भएको छानबिन आयोग मान्दिन भनिरहेका छन् । यस्तो पनि हुन्छ ? यसले के देखाउँछ भने एमाले देशलाई संकटमा धकेल्न खोजिरहेको छ । 

त्यसैको प्रतिक्रिया स्वरुप एमालेलाई अवरोध गरेको हो ? 

हामी त्यस्तो प्रतिक्रियात्मक भएको होइन, हाम्रो कार्यक्रममा अवरोध गर्न एमाले आएका हुन् । 

तर यो घटना भोलि फागुन २१ को चुनाव हुन नसक्ने बहाना बन्न सक्छ भन्ने ख्याल राख्नुभएन ? 

जेनजीहरुमा पनि साथीहरुलाई चोटपटक लागेपछि आक्रोश हुन्छ । एयरपोर्टमा ढुंगामुढा तोडफोड हुनु गलत हो । आजको घटनामा सरकारको संयन्त्र त्यति गम्भीर देखिएन । बदमासी गर्नेलाई, कार्यक्रम बिथोल्न खोज्नेलाई पक्राउ गरेको भए स्थिति सामान्य हुन सक्थ्यो । एमाले नेताहरु कार्यक्रम गर्न जान पाउँथे  ।

थप कुराकानी भिडियोमा हेर्नुहोस्