कांग्रेस महाधिवेशन वैशाखमा गर्ने निर्णय, महामन्त्रीहरु विशेष महाधिवेशनकै अडानमा

नेपाली कांग्रेसले पुस २६ देखि २८ गतेसम्म हुने भनेको महाधिवेशन २०८३ वैशाख अन्तिममा सारेको छ ।

आइतबार बसेको कांग्रेसको कार्यसम्पादन समितिको बैठकले महाधिवेशनको नयाँ कार्यतालिका पारित गरेको छ । जस अनुसार २०८३ वैशाख २८ देखि ३१ गतेसम्म महाधिवेशन हुने भनिएको छ । 

तर महामन्त्रीहरु गगनकुमार थापा र विश्वप्रकाश शर्मा र अन्य केही नेताहरुले फरक मत राखेका छन् । 

महामन्त्री थापाले पुस अन्तिममा विशेष महाधिवेशन हुने बताएका छन् । कांग्रेसका ५४ प्रतिशत महाधिवेशन प्रतिनिधिले विशेष महाधिवेशन माग गर्दै गत असोजमा नै निवेदन दिएका थिए । 

कांग्रेसको विधानको धारा १७ अनुसार ४० प्रतिशत महाधिवेशन प्रतिनिधिले माग गरेमा ३ महिनाभित्र विशेष महाधिवेशन गर्नुपर्छ । 

महामन्त्री थापाले पुस २८ गतेभित्र विशेष महाधिवेशन गर्नुपर्ने बाध्यता विधानले नै सिर्जना गरेकाले अब विशेष महाधिवेशन नै हुने बताए ।

अब विधान महाधिवेशन केन्द्रीय कार्यसमितिले बोलाउनुपर्ने भन्दै उनले केन्द्रीय कार्यसमितिले नबोलाएमा पार्टी केन्द्रीय कार्यालयका तर्फबाट महामन्त्रीहरुले बोलाउने बताए । 

केन्द्रीय कार्यसमितिले १–२ दिनभित्र बैठक राखेर विशेष महाधिवेशन नबोलाएमा आफूहरुले बोलाउने बताए ।