राजावादी नेताहरु एउटै मञ्चमा

राजावादी नेताहरु सोमबार एउटै मञ्चमा देखिएका छन् । राप्रपा नेपालले शान्ति वाटिकामा गरेको विरोध सभामा राजतन्त्र पक्षधर समूह वा दलका नेताहरु उपस्थित भएका हुन् ।

सभामा राप्रपा अध्यक्ष राजेन्द्र लिङ्देन उपस्थित भएपछि अरु नेताहरु उत्साहित भएका हुन् । यसअघि अरुले गरेका विरोध सभा वा प्रदर्शनमा लिङ्देन जाने गरेका थिएनन् ।

सोमबार सभामा पुगेका लिङ्देनले ऐक्यवद्धताका लागि आफू आएको बताए । उनले तीनकुने घटनाबारे छानबिन गर्न न्यायिक आयोग गठन गर्न समेत माग गरे । उनले भने, ‘न्यायिक आयोग गठन नभएसम्म हामी आन्दोलित भइराख्नुपर्छ । यसका लागि सबैसँग सहकार्य गर्न तयार छौं ।’

उनीभन्दा अगाडि बोलेका राजसंस्था पुनर्स्थापना जनआन्दोलन समितिका संयोजक नवराज सुवेदीले राजावादीहरुमा टुटफुट छैन भन्ने प्रष्ट भएको बताएका थिए ।

राप्रपा नेपालका अध्यक्ष कमल थापाले हिन्दु राष्ट्र र राजसंस्थाको पक्षमा आवाज उठाउन नदिने गरी फौजदारी संहितामा संशोधन गर्न खोजेको भन्दै आलोचना गरे ।

संविधानको मर्म विपरीत कानुन संशोधन गरे देशमा आगो बल्ने र त्यसको लप्कोमा सबभन्दा पहिले शासकहरु पर्ने चेतावनी दिए । उनले भने, ‘म सरकारलाई चेतावनी दिन चाहन्छु, तपाईंहरुको यो काम कुनै हालतमा सफल हुने छैन ।’

थापाले राजसंस्था पुनर्स्थापनाको आन्दालेनको सक्रिय नेतृत्व गर्न राप्रपा र त्यसका अध्यक्ष राजेन्द्र लिङ्देनलाई आग्रह गरे । उनले भने, ‘हामी एकढिक्का भएर अगाडि बढ्ने हो भने गणतन्त्र पक्षधर नेताहरु सोच्न बाँध्य हुने छन् ।’