‘फेक एकाउण्ट’मा अल्मलिएका युवालाई उद्यमशील बनाउँछौं : ओली

प्रधानमन्त्री केपी शर्मा ओलीले सामाजिक सञ्जालको फेक एकाउन्टमा अलमलिएका युवालाई उद्यमशील बनाउने बताएका छन् । 

आइतबार प्रतिनिधिसभामा नीति तथा कार्यक्रममाथि उठेका प्रश्नको जवाफ दिने क्रममा उनले जेनजी पुस्ताका लागि ल्याएको कार्यक्रमले सामाजिक सञ्जालमा अलमलिएका युवालाई उद्यमशील बनाउने दाबी गरे । 

‘जेन–जी’ पुस्ताका लागि विशेष स्थान र भूमिका दिएर ल्याइएको नीति तथा कार्यक्रम भएकाले यहाँहरुले यसको आकार र भाषामा परम्परा तोडिएको पाउनु हुनेछ’, उनले भनेका छन्, ‘यसले सामाजिक सञ्जालका फेक एकाउन्टहरुमा अल्मलिएका युवाहरुलाई पनि आफ्नो भविष्य निर्माणमा नयाँ जाँगर र ऊर्जा पैदा गर्न बाटो खोल्ने छ भन्ने अपेक्षा राखेको छु ।’ 

आर्थिक वर्ष २०८२/८३ को नीति तथा कार्यक्रममा सरकारले जेनजी पुस्तालाई लक्षित गर्दै स्टार्ट अप कार्यक्रम ल्याएको छ । 

ओलीले युवाहरुलाई रोजगारीका अवसर सिर्जना गर्ने, विद्यार्थीलाई पढाइ सँगसँगै सरकारी सेवाको इन्टर्नसिपमा प्रवेशको ढोका खोल्ने पनि बताए । 

प्रधानमन्त्री ओलीले नीति तथा कार्यक्रम कार्यान्वयनका लागि केही ऐनहरु संसदले छिटो पारित गर्र्नुपर्ने बताएका छन् । ती विधेयकहरु यी हुन् 

• वैकल्पिक विकास वित्त परिचालनसम्बन्धी विधेयक
• संघीय निजामती सेवासम्बन्धी विधेयक 
• नेपाल प्रहरीसम्बन्धी र सशस्त्र प्रहरी वल नेपालसम्बन्धी कानुनलाई संशोधन तथा एकीकरण गर्न बनेका विधेयक
• विद्यालय शिक्षा विधेयक
• नेपाल हवाइ सेवा प्राधिकरणको स्थापना र व्यवस्था गर्न बनेको विधेयक 
• नेपाल नागरिक उड्डयन प्राधिकरणसम्बन्धी कानुनलाई संशोधन र एकीकरण गर्न बनेको विधेयक