प्रधानमन्त्रीको अभिव्यक्तिप्रति गगन : आइन्दा त्यस्ता कुरा नदोहोरियोस्

१२ जेठ, काठमाडौं । नेपाली कांग्रेसका महामन्त्री गगनकुमार थापाले प्रधानमन्त्रीले नागरिकलाई उत्तेजक बनाउने अभिव्यक्ति दिन नहुने बताएका छन् । सोमवार बसेको पार्टीको पदाधिकारी बैठकपछि सञ्चारकर्मीहरुसँग कुरा गर्दै महामन्त्री थापाले आगामी दिनमा यस्ता उत्तेजक अभिव्यक्ति नदिन प्रधानमन्त्रीको ध्यानाकर्षण गराएका हुन् । 

एमाले अध्यक्ष समेत रहेका प्रधानमन्त्री ओलीले शनिबार गोदावरीमा आयोजित वडाध्यक्षहरुको प्रशिक्षण कार्यक्रममा जेठ १५ गते काठमाडौंलाई एमालेको नियन्त्रणमा हुनुपर्ने बताएका थिए । प्रधानमन्त्रीले उत्तेजक अभिव्यक्ति दिएको भन्दै आलोचना भइरहेको छ । 

कांग्रेस नेताहरुले पनि प्रधानमन्त्रीको सबै अभिव्यक्तिको जिम्मा नलिने बताएको छ । महामन्त्री थापाले पनि कसैले पनि उत्तेजनामा ल्याउने काम गर्न नपाइने बताए ।

उनले भने, ‘हामीले त कसैलाई उत्तेजनामा ल्याउने काम गर्न पाइँदैन भने सम्माननीय प्रधानमन्त्रीले त्यस्तो भन्नुहुन्छ भन्नेकुरा कल्पना पनि गरिँदैन । त्यसैले यो जे जस्ता कुराहरु बाहिर सुनियो, त्यस्ता कुराहरु बाहिर आइन्दा नदोहोरियोस् ।’