प्राज्ञहरुलाई शिक्षामन्त्रीको आग्रह : घाँस नखानुस्

१२ जेठ, काठमाडौं । शिक्षामन्त्री रघुजी पन्तले बुद्धिजिवीहरुलाई घाँस नखान सल्लाह दिएका छन् । त्यसो गर्‍यो भने राजनीतिक नेताहरुले घाँस मात्र खुवाइराख्ने उनको भनाइ छ । 

नेपाली कांग्रेसको शिक्षा विभागले सोमबार राखेको छलफलमा मन्त्री पन्तले आफू संयोगले शिक्षामन्त्री भएको बताए । विद्यालय शिक्षा विधेयकलाई अन्तिम रुप दिनुअघि आफूले शिक्षकहरुसँग भएको सहमतिको अध्ययन गरेकाले उच्च शिक्षालाई कता लैजाने भनेर गम्भीरतापूर्वक हेर्न नपाएको जानकारी दिए । 

निजी क्षेत्रलाई नियमन गर्नुपर्नेमा जोड दिएका उनले युवाहरुलाई कसरी देशमा टिकाइराख्ने भन्ने हेर्नुपर्ने बताए । यसका लागि विभिन्न देशको अभ्यासबारे आफूले अध्ययन गरिरहेको सुनाए । 

उनले भक्तपुरको ख्वप विश्वविद्यालयलाई सम्बन्धन दिन मन लागेको, तर स्थानीय निकायले विश्वविद्यालय चलाउने कानुन नभएकाले क्याबिनेटले फर्काएको बताए । 

आफू विश्वविद्यालयमा प्राज्ञिक स्वतन्त्रताको पक्षमा रहेको समेत उनले बताएका छन् । साथै शिक्षा क्षेत्र राम्रो बनोस् भनेर चाहने विद्यार्थी भएको भन्दै सल्लाह दिन आग्रह गरे । 

तर बुद्धिजिवीहरुले घास खान नहुने बताए । उनले भने, बुद्धिजिवी साथीहरु, प्राज्ञहरु, घाँस नखानुस् । घाँस खान खोज्नुभयो भने पोलिटिसियनले घाँसै खुवाएर चलाइराख्छन् ।’ 

घाँस नखाने अठोट बुद्धिजिवीहरुले गर्नुपर्ने शिक्षामन्त्री पन्तले भने, ‘भीसी चाइन्छ, डिन चाहिन्छ, रेक्टर चाहिन्छ भनेर दौडधुप गरेर लौ न बनाइदेउ भनेपछि उनीहरुले छान्ने भए नि !’ 

उनले लौन सर तपाई भीसी बनिदिनुस् भनेर मन्त्री र प्रधानमन्त्री आउने अवस्था बनाउनुपर्नेमा जोड दिए ।