गृहमन्त्रीको प्रश्न : कर्मचारीमाथि अनुसन्धान गर्दा मन्त्रीले राजीनामा दिनुपर्ने हो ?

१४ जेठ, काठमाडौं । गृहमन्त्री रमेश लेखकले एउटा कर्मचारीमाथि छानबिन गर्दा विभागीय मन्त्रीले राजीनामा दिने थिती बसाल्न नहुने बताएका छन् । 

भिजिट भिसा प्रकरणलाई लिएर विपक्षी दलहरुले गृहमन्त्रीको राजीनामा माग गर्दै संसद अवरुद्ध गर्दै आएका छन् । यो विवाद आएपछि गृहमन्त्री लेखकले संसदमा बोल्न समय मागेका थिए । तर विपक्षी दलहरुले लगातार संसद अवरुद्ध गर्दा उनले बोल्न पाएका छैनन् । 

संसद भवन परिषरमा पत्रकार सम्मेलन गर्दै गृहमन्त्री लेखकले अख्तियारले पक्राउ गरेका अध्यागमन विभागका प्रमुख तीर्थराज भट्टराईलाई आफूले गृहमा नल्याएको बताए । तीन वर्षदेखि उनी गृह मन्त्रालयको महत्वपूर्ण भूमिकामा रहेको भन्दै उनले को गृहमन्त्री हुँदा कुन जिम्मेवारी दिइएको थियो भनेर फेहरिस्त सुनाए ।

अख्तियारले पक्राउ गर्नुभन्दा अगाडि भएको भट्टराईको सरुवा नियमित भएको उनले बताए । 

स्वकीय सचिव विमल पौडेलका सन्दर्भमा लेखकले अदालतले सफाइ दिइसकेपछि जिम्मेवारी नदिनु दण्डनीय हुने कानुनी व्यवस्था रहेको बताए । 

तर भिजिट भिसा प्रकरणमा आफ्नो विषयमा कतै उजुरी नपरेको, कुनै निकायले छानबिन समेत नगरेको भन्दै गृहमन्त्री लेखकले राजनीतिक प्रतिशोध राखेर लान्छना लगाइएको दाबी गरे । 

उनले अगाडि भने, ‘एक जना कर्मचारीमाथि अनुसन्धान गर्ने क्रममा मन्त्रीले राजीनामा गर्दै जाने विधि र पद्धती स्थापित गर्ने हो त ?’

रवि लामिछाने गृहमन्त्री भएको बेला आफूले बोलेको विषयलाई अहिले चर्चामा ल्याएकोमा पनि आफ्नो ध्यानाकर्षण भएको उनले बताए । लेखकले भने, ‘त्यो परिवेश र आजको परिवेशमा आधारभूत फरक छ ।’ 

आफ्नो मन्त्रालय मातहतको निकायले नभई अख्तियारले अनुसन्धान गरिरहेको भन्दै उनले यसमा आफ्नो र मन्त्रालयको सहयोग रहने बताए ।