आज पनि बसेन संसद बैठक, गृहमन्त्रीलाई बोल्न नदिने विपक्षी दलको अडान

विपक्षी दलहरुले गृहमन्त्रीको राजीनामाको अडान नछाडेपछि प्रतिनिधिसभाको बैठक आज पनि बस्न सकेन । दिउँसो १ बजेका लागि बोलाइएको बैठक ४ बजेसम्म बस्न नसकेपछि सूचना टाँसेर बिहीबार दिउँसो १ बजेसम्मलाई सारिएको छ । 

प्रमुख प्रतिपक्षी नेकपा माओवादी केन्द्र र प्रतिपक्षी दल राष्ट्रिय स्वतन्त्र पार्टीले भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने र यो प्रकरण छानबिनका लागि उच्चस्तरीय समिति गठन हुनुपर्ने अडान राखेका छन् । 

एमाले संसदीय दलका प्रमुख सचेतक महेश बर्तौलाका अनुसार प्रतिपक्षी दलहरु संसदमा गृहमन्त्रीलाई सुन्न तयार नभएको, राजीनामा र छानबिन समितिको अडान राखिरहेकाले आजको बैठक पनि बस्न नसकेको बताए । 
यसअघि मंगलबार बोलाएको बैठक पनि दलहरुबीच सहमति हुन नसक्दा बस्दै नबसी स्थगित भएको थियो ।