जसपा नेपालले फिर्ता लियो समर्थन, राष्ट्रिय सभामा सरकार अल्पमतमा 

उपेन्द्र यादव नेतृत्वको जनता समाजवादी पार्टी, नेपालले सरकारलाई दिएको समर्थन फिर्ता लिएको छ ।

बुधबार बसेको संसदीय दलको बैठकले सरकारलाई दिएको समर्थन फिर्ता लिने निर्णय गरेको पार्टीका प्रचार प्रसार तथा प्रकाशन विभाग प्रमुख पूर्ण बस्नेतले जानकारी दिए । 

जसपा नेपालले समर्थन फिर्ता लिएपछि कांग्रेस–एमालेसहितको गठबन्धन सरकारलाई  राष्ट्रियसभामा अप्ठेरो पर्ने देखिएको छ । प्रतिनिधिसभामा कांग्रेस–एमालेको सहज बहुमत भए पनि राष्ट्रियसभामा भने बहुमत पुर्‍याउन जसपा नेपालको समर्थन अनिवार्य छ । 

५९ सदस्यीय राष्ट्रियसभामा नेपाली कांग्रेसका १६ र नेकपा एमालेका १० सांसद छन् । बहुमतका लागि ३० जना सांसदको समर्थन आवश्यक पर्छ । कांग्रेस र एमालेको जोड्दा २६ सांसद मात्र हुन्छन् ।

राष्ट्रियसभाका मनोनित ३ जनामध्ये अञ्जान शाक्य एमालेकी हुन् भने बामदेव गौतम नारायण दाहाल सत्ता गठबन्धानको विपक्षमा छन् ।

यसरी हेर्दा राष्ट्रियसभामा सरकारलाई समर्थन गर्ने सांद २७ जना मात्र हुनेछन् । जसपा नेपालको ३ जना सांसदले समर्थन फिर्ता नलिँदासम्म सरकार बहुमतमा थियो । 

१ सिट भएको लोकतान्त्रिक समाजवादी पार्टीले भने संघीय सरकारलाई दिएको समर्थन फिर्ता लिएको छैन ।