मधेश प्रदेश विपद संकटग्रस्त क्षेत्र घोषणा

सरकारले मधेश प्रदेशका ८ जिल्लालाई विपद संकटग्रस्त क्षेत्र घोषणा गरेको छ ।

बुधबार बसेको मन्त्रपरिषद बैठकले खडेरीका कारण पानीको चरम अभाव भएकाले मधेशलाई विपद संकटग्रस्त क्षेत्र घोषणा गरेको एक मन्त्रीले जानकारी दिए ।

मधेशका सप्तरी, सिरहा, धनुषा, महोत्तरी, सर्लाही, बारा, पर्सा र रौतहट जिल्ला संकटग्रस्त क्षेत्र घोषणा गरिएको हो । मनसुन समयमा पनि पानी नपरेका कारण मधेशमा अझै धेरै खेतबारी बाँझै छ ।

भूमिगत पानीको मुहान जस्तै इनार, ट्युबेल र बोरिङहरु पनि सुकेकाले सर्वसाधारणले खानेपानी पाउन पनि मुश्किल छ । एक मन्त्रीका अनुसार सरकारले ३ महिनाका लागि मधेशलाई विपद संकटग्रस्त क्षेत्र घोषणा गरेको हो ।