मेरो स्वतन्त्रता कसैले खोस्न सक्दैन, एमाले फर्किने निर्णयबाट पछि हट्दिन : विद्या भण्डारी 

पूर्वराष्ट्रपति विद्यादेवी भण्डारीले आफ्नो पार्टी सदस्यता नवीकरण नगर्ने नेकपा एमालेको निर्णयलाई आवेग र उत्तेजनामा गरिएको निर्णय भनेकी छन् । 

शुक्रबार काठमाडौंमा पत्रकार सम्मेलन गरेर उनले संविधान र कानुनले आफूलाई पार्टी सदस्य बन्न नरोकेको भन्दै आवेग र उत्तेजनाका आधारमा निर्णय गर्नु गलत भएको बताएकी छन् । 

आफू संवैधानिक सर्वोच्चता र विधिको शासन गहिरोसँग आत्मसात गरेको मान्छे भएको भन्दै पूर्वराष्ट्रपति भण्डारीले राजनीतिमा संलग्न हुन पाउने आफ्नो स्वतन्त्रतालाई संकुचित गर्न  नमिल्ने बताएकी छन् । 

‘यसले पार्टीको साःखलाई पनि गिराउँछ । आवेग र उत्तेजताको आधारमा गरिएको निर्णयले वास्तविकतालाई छोप्न सकिँदैन’, उनले भनेकी छन् । 

३५ वर्ष एमालेको सदस्य भएपछि राष्ट्रपति भएको भन्दै उनले राष्ट्रपतिको कार्यकाल पूरा गरेपछि पुनः पार्टीमा सक्रिय हुन पाउने आफ्नो अधिकार भएको जिकिर गरेकी छन् । 

भण्डारीले आफ्नो पार्टी सदस्यता नवीकरण भइसकेकाले यसलाई  विवादमा पार्न नहुने पनि बताइन् । 

पूर्वराष्ट्रपति भण्डारीले आफू दलमा आवद्ध हुन नमिल्ने अवस्थै नभएको भन्दै एमालेले गरेको निर्णयलाई अपरिपक्व र हुल हुज्जतका आधारमा गरेको निर्णय भनेकी छन् । ‘कसलाई कतिखेर के मन लाग्यो त्यही आधारमा निर्णय गर्ने कुरा होइन’, उनले भनिन् । 

पार्टीको आस्था विस्वासप्रति कटिवद्ध हुँदाहुँदै पार्टी सदस्य लिनबाट वञ्चित गर्न नमिल्ने पनि उनले बताइन् । 

पूर्वराष्ट्रपति भण्डारीले आफू एमालेको पार्टी राजनीतिमा फर्किने निर्णयबाट पछि नहट्ने भन्दै आफ्ना शुभचिन्तकहरुलाई नआत्तिन अपिल गरेकी छन् ।