काठमाडौंको बानेश्वर क्षेत्रमा कर्फ्यू

२३ भदौ, काठमाडौं । काठमाडौंको बानेश्वर क्षेत्रमा कर्फ्यू लागेको छ । सडकमा उत्रिएका युवा आन्दोलनकारी संसद भवन परिसरमा प्रवेश गरेपछि स्थानीय प्रशासनले कर्फ्यू लगाएको छ । 

जिल्ला प्रशासन कार्यालय, काठमाडौंका अनुसार अपराह्न साढे १२ बजेदेखि राति १० बजेसम्मका लागि कर्फ्यू लगाइएको हो । 

सरकारले नेपालमा दर्ता नभएको भन्दै फेसबुक, युट्युब लगायतका सामाजिक सञ्जाल बन्द गरेपछि जेनजी पुस्ता सोमबार सडकमा उत्रिएका थिए ।

तीनबुँदे माग राखेर आह्वान गरिएको प्रदर्शनमा सयौं सहभागी भए । माइतीघरमा भेला भएका युवाहरु सरकार र प्रधानमन्त्रीविरुद्ध नाराबाजी गर्दै बानेश्वरतर्फ अगाडि बढे । बानेश्वरमा प्रहरीको निषेधित क्षेत्र तोडेका युवाहरु संसद भवन परिसरमा समेत प्रवेश गरेपछि तनाव उत्पन्न भयो । 

प्रहरीले अश्रुग्यासका साथै गोली हानेको छ । स्थानीय प्रशासनले संसद भवन वरिवरिको क्षेत्रमा कर्फ्यू लगाएको छ । 

अब बानेश्वर चोकदेखि पश्चिमतर्फ विजुलीबजारसम्म, पूर्वतर्फ तीनकुनेसम्म, उत्तरततर्फ रत्नराज्य माविसम्म र दक्षिणतर्फ शंखमुल पुलसम्म भेला, जुलुस, सभा घेराउ लगाय गतिविधि गर्न पाइने छैन ।