जेनजीको माग अनुसार सामाजिक सञ्जालको प्रतिबन्ध हटाउन माओवादीको माग

नेकपा माओवादी केन्द्रले जेनजी पुस्ताको माग अनुसार सामाजिक सञ्जाल प्लाटफार्ममाथिको प्रतिबन्ध हटाउन सरकारलाई आग्रह गरेको छ । 

अध्यक्ष प्रचण्डसहित नेताहरु हाल गोरखामा छन् । गोरखाको भीमसेन थापा गाउँपालिका–३ टारिफाँटमा उपलब्ध पदाधिकारीहरुको बैठकले सामाजिक सञ्जालमाथिको प्रतिबन्ध फुकुवा गर्नेसहितको जेनजी पुस्ताको माग पूरा गर्न सरकारलाई आग्रह गरेको छ । 

माओवादीले जेनजीको माग पूरा गरेर स्थिति थप बिग्रिन नदिन जिम्मेवारीपूर्वक ठोस कदम चाल्न पनि सरकारसँग माग गरेको छ । 

माओवादीले यो घटनापछि हाल जारी मध्यपहाडी जनजागरण अभियान स्थगित गर्दै भोलि काठमाडौंमा पदाधिकारी बैठक बस्ने निर्णय गरेको अध्यक्ष प्रचण्डको सचिवालयले जनाएको छ । 

बैठकले जेनजी पुस्ताको प्रदर्शनका क्रममा भएको घटनाप्रति दुःख व्यक्त गरेको छ ।