रास्वपाले माग्यो प्रधानमन्त्रीको राजीनामा र अर्लि इलेक्सन 

राष्ट्रिय स्वतन्त्र पार्टीले सोमबारको आन्दोलनमा प्रहरीले गरेको दमनको विरोध गरेको छ । सोमबार जेनजी पुस्ताले गरेको सडक प्रदर्शनमा प्रहरीले गोली चलाउँदा १५ जना भन्दा धेरैको मृत्यु भएको छ भने १०० भन्दा धेरै घाइते भएका छन् । 

रास्वपा महामन्त्री कविन्द्र बुर्लाकोटीले एक विज्ञप्ति जारी गरेर निहत्था नवयुवाहरुले गरेको शान्तिपूर्ण लोकतानित्रक आन्दोलनको पहिलो प्रहरमै सरकारले आमहत्या गरेको भन्दै निन्दा र भर्त्सना गरेको छ । 

रास्वपाले प्रश्न गरेको छ, ‘आफ्नै सन्तानको रगतमा लतपतिएर कुशासन लम्ब्याउने कुचेष्टा अब जनताले सहने छैनन र यो आततायी शासनको जनप्रतिवाद हुनेछ ।’ 

रास्वपाले सरकारको औचित्य पूर्ण रुपमा समाप्त भइसकेको भन्दै तत्काल राजीनामा माग गरेको छ । साथै घटनाको निष्पक्ष छानबिन गर्न र उच्चस्तरीय न्यायिक छानबिन आयोग गठन गरी गृहमन्त्री लगायत सबै दोषीमाथि कडा कारबाही गर्न पनि रास्वपाले माग गरेको छ । 

रास्वपाले कांग्रेस–एमालेको बर्चश्व रहेको अहिलेको संघीय संसदले कुनै पनि राष्ट्रिय मुद्दाको हल निकाल्न नसक्ने भन्दै ताजा जनादेश अर्थात् अर्लि इलेक्सनको माग गरेको छ । 

हेर्नुहोस् रास्वपाको विज्ञप्ति