प्रधानमन्त्री ओलीले दिए राजीनामा 

२४ भदौ, काठमाडौं । प्रधानमन्त्री केपी शर्मा ओलीले राजीनामा दिएका छन् । उनको निजी सचिवालयले प्रधानमन्त्रीले राजीनामा दिएको जानकारी दिएको हो ।

सोमबार जेनजीको आन्दोलनमा बर्बर दमन भएपछि प्रधानमन्त्री ओलीमाथि राजीनामा दिनुपर्ने दबाव बढेको थियो । सरकारले सामाजिक सञ्जालको प्रतिवन्ध त हटायो, तर ओलीले राजीनामा दिएनन् । 

मंगलबार देशभर आन्दोलन चर्कियो । प्रदर्शनकारीहरुले नेताहरुको घर, संसद भवन, मन्त्री निवास लगायतमा तोडफोड र आगजनी गरे । स्थिति पूर्ण रुपमा नियन्त्रण बाहिर गएपछि प्रधानमन्त्री ओलीले राजीनामा घोषणा गरेका हुन् । 

मुलुकमा उत्पन्न असामान्य परिस्थितिलाई ध्यानमा राख्दै ओलीले भनेका छन्, संविधान सम्मत निकासका लागि र समस्या समाधानको थप पहलका लागि संविधानको धारा ७७ (१) बमोजिम आजकै मितिदेखि लागू हुने गरी प्रधानमन्त्री पदबाट राजीनामा दिएको छु ।’