रास्वपाले भन्यो : मुलुकलाई लोकतन्त्र र विधिको शासनकै बाटो हिँडाउनुपर्छ 

राष्ट्रिय स्वतन्त्र पार्टीले जेनजी आन्दोलनपछिको नयाँ परिस्थितिमा पनि मुलुकलाई विधिको शासन, कानुनी सर्वोच्चता जस्ता लोकतन्त्रका आधारभूत मूल्य मान्यतामा अगाडि बढाउनुपर्ने बताएको छ । 

महामन्त्री कविन्द्र बुर्लाकोटीले एक विज्ञप्ति जारी गरी अबको राजनीतिक प्रक्रियालाई शान्तिपूर्ण, रचनात्मक, सहभागितामूलक र पारदर्शी बनाउन सकेमा मात्र परिवर्तन दिगो हुने बताएका छन् । 

‘नयाँ परिस्थितिमा पनि मुलुक विधिको शासन, कानुनी सर्वोच्चता, मानवअधिकार, आवधिक निर्वाचन, अभिव्यक्ति स्वतन्त्रता जस्ता लोकतन्त्रका आधारभूत मूल्य मान्यता एवं राजनीतिक सहअस्तित्वकै आधारमा अगाडि बढाउनुपर्छ भन्नेमा रास्वपा दृढ छ’, विज्ञप्तिमा भनिएको छ । 

परिस्थिति सामान्य बनाउन सुरक्षा निकायबाट थालिएको प्रयासमा साथ दिन, नागरिक सुरक्षा, सार्वजनिक सम्पत्तिको संरक्षण र कानुनी व्यवस्था पुनर्बहाली गर्न आम समुदायको योगदानका लागि रास्वपाले आग्रह गरेको छ । 

राजनीतिक कोर्षलाई सही दिशा दिन, शान्ति सुव्यवस्था कायम राख्न र सामाजिक सद्भाव अभिवृद्धिमा जनस्तरबाट निरन्तर खबरदारी र पहलकदमीका लागि पनि रास्वपाले अपिल गरेको छ । 

हेर्नुहोस् राष्ट्रिय स्वतन्त्र पार्टीको विज्ञप्ति