जेनजी आन्दोलनबाट सर्वोच्चसँगै ७ उच्च र १४ जिल्ला अदालतमा क्षति

जेनजी पुस्ताको आन्दोलनका क्रममा भदौ २४ गते सर्वोच्च अदालतसँगै देशभरिका २२ अदालत जलेको पाइएको छ । प्रधानन्यायाधीश प्रकाशमान सिंह राउतका अनुसार सर्वोच्च अदालत, विशेष अदालत, ७ वटा उच्च अदालत र १४ वटा जिल्ला अदालत जलेका छन् । 

उच्च अदालत विराटनगर, उच्च अदालत वीरगञ्जको राजविराज इजलास, उच्च अदालत पोखरा, उच्च अदालत तुल्सीपुर, बुटवल इजलास र नेपालगञ्ज इजलास अनि उच्च अदालत पाटनको बुटवल इजलास जलेको प्रधानन्यायाधीश राउतले पत्रकार टीकाराम यात्रीसँगको अन्तर्वार्तामा बताएका छन् ।

त्यस्तै मोरङ, सप्तरी, सिरहा, काठमाडौं, सिन्धुली, मकवानपुर, चितवन, कास्की, कपिलवस्तु तनहुँ, दाङ, बाँके, कैलाली र सर्लाही जिल्ला अदालत पनि जलेका छनु । 

अदालतमा आगजनी तोडफोड र लुटपाट हुँदा भवन र फर्निचरका साथै मुद्दासँग सम्बन्धित धेरै प्रमाणहरु नष्ट भएका छन् । तीबाहेक अन्य ऐतिहासिक दस्तावेजहरु पनि नष्ट भएका उनले बताए । 

प्रधानन्यायाधीश राउतका अनुसार आन्दोलनका क्रममा जेलबाट बाहिर निस्केका कैदीबन्दीहरु आफ्नो मुद्दा भएको अदालतमा पुगेका थिए । उनीहरुले नै जलाएको आशंका गर्दै उनले यस विषयमा छानबिन हुनुपर्ने बताए ।