'भ्रष्ट सरकार त ढल्यो, अरु माग बाँकी नै छ'

भदौ २३ गते जेनजी आन्दोलनका क्रममा उनलाई बानेश्वरको आकाशे पुलनिर गोली लाग्यो । 

देब्रे हातको पछाडिबाट गोली लागेर अगाडिबाट निस्किएको छ । पाखुराको हड्डी पनि फुटेको छ । मोरङकी लिजा अधिकारी अहिले काठमाडौंको राष्ट्रिय ट्रमा सेन्टरमा उपचाररत छिन् ।

घाउमा नियमित ड्रेसिङ गरिरहनुपर्छ ।  लिजालाई त्यो दिन प्रहरीले आन्दोलनकारीलाई गोली हानेको सम्झिँदा अहिले पनि रिस उठ्छ । 

लिजा ललितपुर बालकुमारीको काठमाडौं विश्वविद्यालय स्कुल अफ म्यानेजमेन्ट (कुसोम) मा बीबीए पढ्दै छिन् । सरकारले सोसल मिडियामा प्रतिबन्ध लगाएपछि त्यसको विरोध भइरहेको थियो ।

काठमाडौंमा सडक आन्दोलनको तयारी भइरहेको थियो । 

लिजा र केही साथीहरुले भदौ २२ गते भाइबर र टिकटकमा ग्रुप बनाएर आन्दोलनमा जाने सल्लाह गरे । 

भदौ २३ गते लिजा बिहान ११ बजे माइतीघर मण्डलमा पुगिन् । जुलुससँगै  बानेश्वरसम्म पुगिन् । गोली चलेपछि आन्दोलन एकैछिनमा उग्र भएको लिजा  बताउँछिन् । 

जेनजी आन्दोलनको माग धेरै ठूलो थिएन । भ्रष्टाचारको अन्त्य र सुशासन उनीहरुको माग थियो । यो माग लिएर आन्दोलन गर्दा गोली नै हान्नुपर्छ भन्ने उनलाई  लाग्दै लाग्दैन । 

लिजा घरमा ममी र भाइसँग बस्छिन् । आन्दोलनमा जाने भन्दा उनकी ममी पहिल्यै डराएकी थिइन् । उनी ढाँटेर जुलुसमा गइन् । जुलसमा हुँदा पनि पटक पटक फोन गरेर फर्किन भनिरहेकी थिइन् । 

आन्दोलनमा गोली चल्न थालेपछि भने उनी पनि घर फर्किने भनेर जुलुसको छेउ लागेर बसिन् । त्यही बेला उनलाई गोली लागेको थियो । 

उनलाई गोली लागेको थाहा पाएर उनकी ममी बेहोस् भइन् । त्यति मात्र होइन, सामाजिक सञ्जालमा उनको मृत्यु भएको सूचनाहरु पनि आयो । 

सामाजिक सञ्जालभरि लिजाको नाम डेडलिस्टमा आएपछि उनको परिवार र आफन्तलाई चोट परेको थियो ।

जे उद्देश्यले जेनजी प्रदर्शन सुरु भएको थियो । त्यो आन्दोलनपछि केपी शर्मा ओली नेतृत्वको सरकार ढलेको छ र आन्दोलनको बलमा सुशीला कार्की नेतृत्वको सरकार बनेको छ । तर सरकार फेरिएर मात्र नहुने भन्दै उनले जेनजीको माग पूरा हुन बाँकी नै रहेको बताइन् ।