एनआरएनले एक खर्ब लगानी ल्याइसके : बद्री केसी 

गैरआवासीय नेपाली संघ (एनआरएनए) का अध्यक्ष बद्री केसीले एनआरएनले नेपालमा करिव एक खर्ब लगानी भित्र्याएको बताएका छन् । 

२२ औं स्थापना दिवसको अवसरमा शनिबार काठमाडौंमा पत्रकार सम्मेलन गरी एनआरएनएका अध्यक्ष डा. बद्री केसीले नेपालको अर्थतन्त्रमा ठूलो सुधार ल्याउनका लागि आफूहरुको योगदान रहेको बताए । 

‘अहिलेको अवस्थामा नेपालमा १ खर्ब भन्दा बढी गैरआवासीय नेपालीहरुको शिक्षा क्षेत्रमा, बैकिङ क्षेत्रमा, कृषि क्षेत्रमा, हाइड्रो क्षेत्रलगायतका विभिन्न क्षेत्रमा लगानी छ । यदि नेपालमा कुनै पनि दुर्गम ठाउँमा पनि आधुनिक, सफा क्याफे देख्नुहुन्छ भने त्यो गैरआवासीय नेपालीले खोलेको छ’, उनले भने । 

उनले विदेश गएर नेपालीले सिकेको सीप र कमाएको पैसा विदेशी भूमिमा लगानी गर्नुभन्दा नेपालमा बढी लगानी गर्नुपर्छ भनेर लागेको बताए । 

एनआरएनले आफूहरुले विश्वभर नेपालको पहिचान दिलाउन महत्वपूर्ण योगदान दिएको पनि दाबी गर्दै आएको छ । अध्यक्ष केसीले दूतावास नभएको ठाउँमा पनि नेपालीहरुले आफ्नो देशको पहिचान गराउने काम गरेको जिकिर गरे ।