एक्सप्लेनर भिडियो

स्वर्गद्वारी गुठीपीडित किसान ५० दिनदेखि धर्नामा

नेपाल शो

शनिबार, चैत ९, २०८१

दाङका १२ गाउँका १०० जना किसान काठमाडौंमा आएर आन्दोलन गरेको ५० दिन भइसक्यो । स्वर्गद्वारी गुठीपीडित किसानहरु गौशालाको धर्मशालामा बसेका छन् । उनीहरुले सरकारसँग ४ बुँदे माग राखेका छन् ।
भूमि व्यवस्था मन्त्रालयले सहसचिव मदन कोइरालाको नेतृत्वमा ३ सदस्यीय टोली गठन गरेको छ ।
चैत ६ गते भएको तेस्रो चरणको वार्तामा सरकारी टोलीले गुठीसम्बन्धी विधेयकको मस्यौदा भनेर एउटा कागज नै देखाएको थियो । र यो विधेयक बुधबारसम्म अगाडि बढाउछौं भनेको थियो । तर अगाडि बढेको छैन ।
अब आइतबार र सोमबार पर्खिने र त्यतिबेलासम्म माग पूरा नभए दाङबाट थप ५ हजार किसान काठमाडौं आउने तयारीमा छन् ।
दाङको घोराही र तुलसीपुर उपमहानगरपालिका तथा लमही नगरपालिकाका करिब ३५०० घरधुरी किसानले पुस्तौंदेखि कमाइ गरिरहेको जग्गा प्युठानको धार्मिक स्थल स्वर्गद्वारीको नामको गुठीमा छ ।
तीन पालिकाको १२ वटा गाउँमा एक हजार ५० विघा जग्गा स्वर्गद्वारी गुठीको नाममा छ । गुठीको जग्गाहरु कमाइ गर्नेहरु अधिकांश थारु समुदायका छन् । ६०० विघा जग्गा उपभोग गर्नेसँग स्वर्गद्वारी गुठीले दिएको मोही पुर्जा छ ।
तर सर्वोच्च अदालतले २०६२ चैत १४ गतेको एउटा फैसलाले उनीहरुको मोही पूर्जालाई अमान्य घोषित गरिदिएपछि किसान आन्दोलनमा उत्रिएका हुन् ।

प्रकाशित मिति: शनिबार, चैत ९, २०८१