दुई दिनमै प्रधानमन्त्री राहत कोषमा झण्डै २ अर्ब संकलन

प्रधानमन्त्री दैवी प्रकोप उद्धार कोषमा ३६ घण्टा अवधिमा एक अर्ब ९१ करोड रुपैयाँ सहयोग संकलन भएको छ ।

बुधबार मध्याह्नदेखि बिहीबार राति १२ बजेसम्म कोषमा एक अर्ब ९१ करोड ८६ लाख ५० हजार ९११ रुपैयाँ जम्मा भएको अर्थमन्त्री स्वर्णिम वाग्लेको सचिवालयले जनाएको छ । यो रकम प्रधानमन्त्री राहत कोषको विभिन्न १० वटा वाणिज्य बैंकको खातामा छ ।

यो रकम संकलनसँगै कोषमा ४ अर्ब ९ करोड ११ लाख ६० हजार रुपैयाँ पुगेको छ । यो कोषमा जम्मा भएको रकममा विदेशी राष्ट्रहरुले गरेको सहयोग रकम समावेश छैन ।

बुधबार बिहान नेपाल-चीन सीमा भएर बग्ने भोटेकोशी नदीमा भीषण बाढी आएर ठूलो धनजनको क्षति गरेपछि सरकारले प्रभावित क्षेत्रलाई संकटग्रस्त घोषणा गरेर राहत कोषमा सहयोग आह्वान गरेको थियो ।