एक्सप्लेनर भिडियो

राजावादीको मनोबल उकास्ने आन्दोलन

नेपाल शो

मंगलबार, चैत २६, २०८१

राष्ट्रिय प्रजातन्त्र पार्टीलाई आज काठमाडौंको बल्खुमा आयोजित प्रदर्शन र आमसभा शान्तिपूर्ण बनाउन सकिन्न कि भन्ने डर थियो ।
राजावादी आन्दोलनलाई बदनाम गर्न सरकार नै लागेको उसको निष्कर्ष थियो । तर बल्खुमा राप्रपाको प्रदर्शन र आमसभा शान्तिपूर्ण रह्यो ।
कार्यक्रममा ठूलो संख्यामा सेतो टिसर्ट लगाएका स्वयंसेवक परिचालन गरिएको थियो ।
र्‍यालीहरु सभास्थल मिसिने बेला केही बेरमात्रै चक्रपथमा यातायात अवरुद्ध भएको थियो । नभए आमसभा चलिरहँदा पनि चक्रपथको एउटा लेनमा गाडी गुडिरह्यो ।
बल्खुको कार्यक्रमको तुलना तीनकुनेसँग हुनै सक्दैन । तीनकुनेमा प्रदर्शनकारी आमसभा स्थल छाडेर प्रहरीको घेरा तोड्न उदत्त भएका थिए ।
आयोजक दुर्गा प्रसाईंले नै सुरक्षाकर्मीलाई किचौंला झैं गरेर गाडी हाँकेर सुरक्षा घेरा तोडेका थिए ।
राप्रपा नेताहरु पार्टीले आयोजना गर्ने कार्यक्रम जहिले पनि शान्तिपूर्ण हुने बताउँछन् । अध्यक्ष राजेन्द्र लिङ्देनले पनि आफूहरु शान्तिपूर्ण आन्दोलनबाटै आफ्ना मान्यता स्थापित गर्न सकिन्छ भन्ने मान्यतामा रहेको बताए ।
तीनकुने घटनाबाट राजावादीहरुको मनोबल गिरेको थियो । राप्रपाको आजको कार्यक्रमबाट राजसंस्था पक्षधरको मनोबल उच्च भएको राप्रपा प्रवक्ता मोहनकुमार श्रेष्ठको दाबी छ ।

प्रकाशित मिति: मंगलबार, चैत २६, २०८१