एक्सप्लेनर भिडियो

पूर्वराजाको सन्देश : हिंसा मान्दिनँ, राजनीतिक स्पेस देऊ

नेपाल शो

आइतबार, चैत ३१, २०८१

तीनकुनेमा दुर्गा प्रसाइँहरुले मच्चाएको अराजकताको बाछिटा निर्मल निवाससम्म पुगेको छ । आइतबार पूर्वराजा ज्ञानेन्द्र शाहले यो घटनाबारे मौनता तोडेका छन् ।
नयाँ वर्ष २०८२ को अवसरमा शुभकामना सन्देश दिने क्रममा उनले तीनकुने घटनाबारे मात्र बोलेनन्, आफूमाथि लागेको केही आरोपको स्पष्टीकरण दिएका छन् र, आफ्नो स्पेस दाबी गरेका छन् ।
सँगसँगै उनले सरकारतर्फ इंगित गर्दै नागरिक स्वतन्त्रताभन्दा ठूलो तन्त्र वा वाद नहुने बताएका छन् । सरकारले पनि नागरिकको आवाज सुन्नपर्छ भन्ने उनको मत छ ।
तीनुकने घटनापछि कांग्रेस नेताहरुको एउटै मत थियो, नेपालका कहिल्यै राजाहरु संवैधानिक सीमामा बस्दै बसेनन् । अहिले पनि सीमा नाघ्दैछन् । आइतबारको भिडियो सन्देशमा पूर्वराजा ज्ञानेन्द्रले त्यसमा स्पष्टीकरण दिएका छन् । अर्थात नेपालका राजाहरु संवैधानिक सीमामा बस्छन् भन्ने स्थापित गर्न खोजेका छन् ।
राजावादीहरुले राजतन्त्रमा सबथोक राम्रो थियो, अहिले बिग्रिएको हो भन्ने भाष्य स्थापित गर्ने प्रयास गर्दै आएका छन् । पूर्वराजा ज्ञानेन्द्र शाहले पनि निरन्तर उनीहरुसँग मिल्दोजुल्दो धारणा दिएका छन् ।
राजाले संवैधानिक राजसंस्थाको माग गर्ने संसदको एक मात्र दल राप्रपाकै भाषा बोलेका छन् । र, अशान्ति, अराजकता, निराशाबाट आम नेपालीलाई मुक्त गर्नसक्ने संस्थाका रुपमा राजसंस्थालाई देखाएर राजनीतिक स्पेश खोजेका हुन् ।

प्रकाशित मिति: आइतबार, चैत ३१, २०८१