एक्सप्लेनर भिडियो

युनिटीका नाममा यसरी ठगिएको थियो ६ अर्ब

नेपाल शो

शुक्रबार, वैशाख ५, २०८२

२०६२–०६३ पछिको खुला समयमा धेरै नेपालीमा छिटै धनी हुने चाहना थियो । त्यसलाई सजिलै दुरुपयोग गरिदियो युनिटी लाइफ इन्टरनेशन नामको कम्पनीले । उसले बीमा र स्वास्थ्य कार्यक्रमका नाममा सर्वसाधारणसँग पैसा उठायो ।
बीमा हुने, निशुल्क उपचार हुने, प्रिमियमको रकमबाट बैंकको मुद्दती खातामा भन्दा बढी ब्याज पाइने, अनि अरु सदस्य बनाए कमिसन पनि पाइने लोभ देखायो ।
नेपालमा ४ लाख हाराहारी र विदेशमा समेत सदस्य बनायो । उनीहरुबाट ४ अर्ब रुपैयाँ भन्दा बढी पैसा संकलन गर्‍यो । यो पैसा अस्पताल, डिपार्टमेन्ट स्टोर्स, ट्राभल एण्ड टुर्स, हवाइ जहाज, डेरी उद्योग आदिमा लगानी गर्ने भन्यो । देशका धेरै ठाउँमा अस्पताल र डिपार्टमेन्ट स्टोर्स पनि खोल्यो । सम्पत्ति बढाएर ६ अर्ब हाराहारी पुर्‍यायो ।
तर बीमा पोलिसी बेच्न र बैंकले जस्तो आर्थिक कारोबार गर्न उसले अनुमति लिएको थिएन । आफ्ना कार्यक्रम बेच्न देशभरि एजेन्टहरु खटायो । सदस्यवापत राम्रो कमिसनको लोभ देखायो । कतिले एक्लै सदस्य बने, कतिले घर परिवार र साथीहरुलाई पनि सदस्य बनाए ।
एजेन्टहरुले धेरै व्यक्तिलाई सदस्य बनाएर लाखौं रकम एकै पटक कम्पनीलाई बुझाए । तर अन्तिममा सबै ठगिए ।
यो मुद्दा जिल्ला अदालत, उच्च अदालत हुँदै सर्वोच्चसम्म आयो । सर्वोच्चले ७ जना सञ्चालक र २ जना कर्मचारीलाई जेल सजायको फैसला गर्‍यो । तर के ठगीमा परेकाहरुले पैसा फिर्ता पाउलान् त ?

प्रकाशित मिति: शुक्रबार, वैशाख ५, २०८२