एक्सप्लेनर भिडियो

सीके राउतलाई आलिसान घर, कोषाध्यक्षलाई हत्कडी

नेपाल शो

सोमबार, वैशाख ८, २०८२

जनमत पार्टीका अध्यक्ष सीके राउतको विलासी बसोबास र परिवारवादले पार्टीभित्र विवाद बढ्दो छ । यही विवादका कारण कोषाध्यक्ष सुरेन्द्र यादव हाल जिल्ला प्रहरी परिसर ललितपुरको हिरासतमा छन्, उपाध्यक्ष दीपककुमार साह निलम्बनमा छन् ।
२०७९ मंसिरको चुनावको उम्मेदवारी दर्ताको समयमा टिकटलाई लिएर विवादको विजोरापण भयो । पार्टीमा स्थापना कालदेखि सक्रिय सुरेन्द्र यादव सप्तरी १ बाट प्रतिनिधिसभा सदस्यमा उठ्न चाहेका थिए । तर राउतले आफ्ना दाजु सीके राउतलाई टिकट दिए । जयकान्तले चुनाव हारे ।
पछि जयकान्तलाई नै राष्ट्रिय योजना आयोगको सदस्य बनाए । योजना आयोगबाट हट्नासाथ उनैलाई पार्टीको राष्ट्रिय परिषद्को अध्यक्ष मनोनित गरिदिए ।
जनमतले ललितपुरको इमाडोलमा घर किन्यो । त्यहाँ अहिले सीके राउत बस्ने गरेका छन् । राउतको इच्छा पूरा गर्न झण्डै ३ करोड खर्चिएर इमाडोलमा घर किनिएको छ । राउतले घरमा फराकिलो पार्किङ स्पेस पनि खोजे । त्यसका लागि फेरि केही करोड खर्चिएर जग्गा जोडिएको छ, पार्किङ बनाइएको छ ।
एक नेताका अनुसार इमाडोलको घर जग्गा किन्ने क्रममा समानुपातिक सांसदहरुसँग पैसा उठाउने काम समेत भयो । पार्टीमा सीके राउतका दाइ जयकान्त यति हावी भए । लेनदेन, हरहिसाब सबै उनीमार्फत नै हुन थाल्यो ।
पछिल्लो पटक जनमतका अध्यक्ष सीके राउतले ललितपुर र जनकपुरको घर समेत आफ्नो दाइ जयकान्तकै नाममा नामसारी गर्न दबाव दिएपछि विवाद चर्कियो । यही विवादपछि कोषाध्यक्ष सुरेन्द्र यादवविरुद्ध पार्टीकै नेताहरुले आपराधिक विश्वासघातमा उजुरी दिए र उनी पक्राउ परे ।

प्रकाशित मिति: सोमबार, वैशाख ८, २०८२