पाकिस्तानविरुद्ध भारतको ‘वाटर स्ट्राइक’

जम्मु कश्मिरको पहलगाममा भएको आतंकवादी हमलापछि भारतले पाकिस्तानविरुद्ध कडा नीति लिएको छ । जसमा सबभन्दा महत्वपूर्ण चाहिँ सिन्धु जल सम्झौता निलम्बन हो । यसलाई भारतीय सञ्चार माध्यमहरुले वाटर स्ट्राइक भनेका छन् । 

सिन्धु नदीसँगै यसका दुई सहायक नदी झेलम र चिनाब पाकिस्तानको जीवन रेखा हो । यो नदी चार देश भएर बग्छ र २१ करोडभन्दा बढी मानिसको जल आवश्यकता पूरा गर्छ ।  

भारत र पाकिस्तानबीच अनेकौं पटक तनावहरु भएका छन्, तर यो सम्झौता तलमाथि भएन । भारत र पाकिस्तानको युद्ध हुँदा समेत यसलाई चलाइएन । 

तर यो पटक भारतले सिन्धु जल सम्झौतालाई निलम्बन गर्ने निर्णय लिएको छ । भारतीय अधिकारीहरुका अनुसार यो निलम्बन त्यो बेलासम्म रहन्छ, जबसम्म पाकिस्तानले विश्वसनीय रुपमा सीमा क्षेत्रमा आतंकवादलाई समर्थन गर्न बन्द गर्दैन । 

पानीको अभावका कारण लाखौं एकड जमिन सुख्खा हुनेछ । यदि जमिन सुख्खा रह्यो भने लाखौं नागरिक समस्यामा पर्नेछन् । किनकी पाकिस्तानको ९० प्रतिशत कृषि उत्पादन सिन्धु जल सम्झौतासँग जोडिएको छ ।

जसरी भारतले पहिलो पटक सिन्धु जल सम्झौतालाई निलम्बन गर्ने कदम चालेको छ, यसले पाकिस्तानमा भोलिका दिनमा आउनसक्ने संकटको भने संकेत गरेको छ ।