शिक्षक आन्दोलनमा कर्मचारीलाई धोका ! अब एक्लै आन्दोलन

विद्यालय कर्मचारीहरुले नेपाल शिक्षक महासंघले धोका दियो भनिरहेका छन् । 

आन्दोलनपछि अस्थायी शिक्षकहरुको बिरामी बिदा सञ्चित हुने भयो र दुर्गम भत्ता पाउने भए । तर विद्यालय कर्मचारीको न बिरामी बिदाको निर्णय भयो न दुर्गम भत्ता । उनीहरुको तलब पनि कति हुने  भनेर तोकिएन । 

२९ दिनसम्म चलेको आन्दोलनमा शिक्षक र कर्मचारी सँगसँगै थिए । तर माग चाहिँ शिक्षकको मात्र पूरा भयो, कर्मचारीको माग जस्ताको तस्तै रह्यो । 

शुक्रबार पत्रकार सम्मेलन गरेर विद्यालय कर्मचारी परिषदले ७ बुँदे माग सार्वजनिक गरेको छ । र आन्दोलनको कार्यक्रम सार्वजनिक गरेको छ । 

अहिले विद्यालयमा लेखाको काम गर्ने कर्मचारीलाई संघीय सरकारले मासिक १३ हजार ५०० रुपैयाँ तलब दिन्छ । अनि विद्यालय सहयोगीलाई मासिक ८ हजार रुपैयाँ ।

स्थानीय सरकारले लेखापाल र विद्यालय सहयोगी दुबैलाई मासिक ७/७ हजार थपिदिनुपर्ने पनि संघीय सरकारको निर्णय छ । कतिपय स्थानीय तहले संघीय सरकारले भने अनुसार मासिक ७/७ हजार थपिदिएका छन् । 

स्थानीय सरकारले पैसा थपिदिँदा लेखाका कर्मचारीले २० हजार ५०० रुपैयाँ पाउँछन् । अनि विद्यालय सहयोगीले मासिक १५ हजार रुपैयाँ पाउँछन् । तर कतिपय स्थानीय तहले पैसा छैन भनेर दिएका छैनन् । 

आन्दोलनका बेला विद्यालय कर्मचारीको माग लेखाका कर्मचारीको तलब खरिदार सरह ३२ हजार ९०२ हुनुपर्छ भन्ने थियो । अनि विद्यालय सहयोगीलाई निजामती कर्मचारीको श्रेणीविहीन कर्मचारी सरह २६ हजार ८२ रुपैयाँ दिनुपर्छ भन्ने थियो । 

तर कर्मचारीको तलब सरकारले तोके बमोजिम हुने भनेर मात्र लेखियो ।

आन्दोलनमा कर्मचारीको माग किन पूरा भएन ? शिक्षक महासंघका पदाधिकारी भने कर्मचारीहरुले कुरा नबुझेको बताउँछन् । खास भएको के हो ?