विदेशमा श्रम गर्न जाँदा पनि घुस

अहिले भिजिट भिसामा जानेहरुले अध्यागमन कार्यालयमा बुझाउने घुसको विषय चर्चामा छ । त्रिभुवन विमानस्थल अध्यागमन कार्यालयका प्रमुख त पक्राउ नै परे भने गृहमन्त्री रमेश लेखकमाथि प्रश्न उठिरहेको छ । 

विदेश जाने श्रमिकले घुस बझाउने ठाउँ अध्यागमन कार्यालय मात्र भने हैन । भिजिट भिसामा त बाध्य भएर अवैध रुपमा जानेहरुले घुस बझाउँछन् । तर, वैध रुपमा वैदेशिक रोजगारीमा जान्छु भन्नेहरुलाई पनि श्रम स्वीकृतिका नाममा घुस बुझाउनुपर्ने बाध्यता छ । 

विशेषगरी व्यक्तिगत श्रम स्वीकृतिमा जानेहरुले ताहाचलस्थित वैदेशिक रोजगार विभाग र प्रदेशमा रहेका श्रम कार्यालयका कर्मचारीहरुलाई घुस खुवाउनुपर्छ । कर्मचारीहरुले घुस सोझै आफैं लिँदैनन्, एजेन्टमार्फत लिन्छन् । 

गत पुस महिनाको एउटा घटना हेरौं । २ जना युवक कुवेत जाने तयारीमा थिए । उनीहरुलाई सिनामंगलको एक म्यानपावरले विदेश पठाउँदै थियो । 

तर, उनीहरुले म्यानपावर कम्पनीमार्फत जान लागेको हो भन्दा वैदेशिक रोजगार विभागबाट श्रम स्वीकृति पाउनेवाला थिएनन् । 

किनभने त्यो म्यानपावर कम्पनीले कुवेतबाट ल्याउन खोजेको डिमान्ड लेटर नेपाली दूतावासले प्रमाणीकरण गरिएको थिएन । 

त्यसैकारण म्यानपावरले ती दुई युवकलाई व्यक्तिगत श्रम स्वीकृति लिएर पठाउन सहमत गरायो । कुवेतमा कृषिको काममा भनेर जान लागेका उनीहरुले सेवा शुल्कबापत प्रतिव्यक्ति २ लाख ५० हजार र श्रममा सेटिङका लागि भनेर एकमुष्ट ६५ हजार रुपैयाँ बुझाए । 

उनीहरु श्रम स्वीकृतिको प्रक्रिया पूरा गरेरै कुवेत पुगे । तर, भनेअनुसार काम र तलब पाएनन् । दूतावास गएर गुनासो गरेपछि फर्किएर आए । 

त्यसपछि उनीहरु ठगिएको गुनासो गर्दै विभिन्न निकाय धाए । सोधीखोजी सुरु भयो । त्यसक्रममा पत्ता लाग्यो, उनीहरुको श्रम स्वीकृति नै फेक कागजातका आधारमा जारी भएको रहेछ ।

थप विवरण भिडियोमा