लाइसेन्स छाप्ने मेसिन नै जल्यो, इम्बोस्ड नम्बर पनि खरानी

भदौ २४ गतेको आन्दोलनमा जलेर नष्ट भएको एउटा कार्यालय हो, यातायात व्यवस्था विभाग । काठमाडौं नयाँ बानेश्वरमा संघीय संसद भवन नजिकै रहेको यो कार्यालयमा अहिले सग्लो केही पनि छैन । 

यो कार्यालयको काम भनेको देशभरिका सवारी साधनको रेकर्ड राख्ने, सवारी चालक अनुमतिपत्र (लाइसेन्स) को रेकर्ड राख्ने र वितरण गर्ने अनि इम्बोस्ड नम्बर प्लेट वितरण गर्ने हो । 

अहिले यहाँ प्रिन्ट भएर आएका हजारौं लाइसेन्स नष्ट भएका छन् । यातायात व्यवस्थ विभागले समयमा लाइसेन्स प्रिन्ट गरेर दिन सकेको थिएन । उसले विदेश जानेहरुका लागि भने लाइसेन्स प्रिन्ट गरेर दिने गरेको थियो । 

विदेश जाने दिन आइसकेका कतिपय सर्वसाधारण आफ्नो लाइसेन्सको हाल बुझ्न शुक्रबार विभाग पुगेका छन् । तर सबै जलेको देखेपछि उनीहरु अब के गर्ने भन्ने अन्योलमा छन् । कर्मचारीहरु पनि शुक्रबारदेखि कार्यालय आएका छन् । 

विभागले समयमा लाइसेन्स छापेर दिन नसक्दा र हालै इम्बोस्ड नम्बर प्लेट अनिवार्य गरेका कारण नागरिकमा चर्को असन्तुष्टि थियो । तर यत्ति कारणले मात्र यो भवन सबै जल्यो भन्न सकिने अवस्था छैन । 

एक त यो संसद भवनको नजिक थियो र यहाँ सशस्त्र प्रहरीको गण पनि थियो । त्यसैले संसद जलाउन आएको समूहले यातायात कार्यालयलाई पनि बाँकी राखेन । भवनको कुनै भाग काम लाग्ने छैन, सबै कोठा जलेका छन्, झ्याल ढोका कुनै सद्दे छैन । 

यातायात व्यवस्था विभागको डेटा सर्भर भएको कोठा सबै जलेको छ । अब यातायातको प्रणालीमा भएका कागजातहरु पनि पाउन मुश्किल छ । पुराना कागजात राखिएको कक्ष पनि पुरै जलेको छ ।

थप विवरण भिडियोमा हेर्नुहोस् :