गृहमन्त्रीमा अर्याल, खनाल र कुलमान पनि मन्त्री बन्दै

काठमाडौं । नयाँ सरकारमा ओमप्रकाश अर्याल,  रामेश्वर खनाल र कुलमान घिसिङ मन्त्री हुने पक्का भएको छ । प्रधानमन्त्री सुशीला कार्कीले तीन जनासँग नै सम्वादपछि मन्त्रीको नाम टुंगो लगाएकी हुन् । 

अर्याल गृह र कानुनमन्त्री बन्दैछन् । उनी यसअघि काठमाडौं महानगरपालिकाका मेयर बालेन शाहका कानुनी सल्लाहकार  थिए । यस्तै उनी चर्चत कानुन व्यवसायी समेत हुन् । 

रामेश्वर खनाल अर्थसहित सम्बद्ध केही मन्त्रालयहरुको मन्त्री हुनेछन् । अर्थमन्त्री हुन लागेका खनाल पूर्व अर्थसचिव हुन् । तत्कालीन अर्थमन्त्री भरतमोहन अधिकारीले अनावश्यक दबाब दिएको भन्दै उनले पद छाडेका थिए । उनी यसअघिको सरकारले बनाएको उच्चस्तरीय आर्थिक सुधार सुझव आयोगका अध्यक्ष पनि थिए । 

यस्तै कुलमान घिसिङ भने ऊर्जा, भौतिक पूर्वाधार तथा यातायात र शहरी विकाससहित प्राविधिक मन्त्रालयको मन्त्री हुनेछन् ।  घिसिङ भने नेपाल विद्युत प्राधिकरणका पूर्वकार्यकारी निर्देशक हुन् । उनको नेतृत्वले नै नेपालमा लोडसेडिङ हटाएकाले उनी लोकप्रिय छन् ।  

भोलि उनीहरुको नियुक्ति र सपथ हुनेछ ।