सेयर लगानीकर्ताको मनोबल बढाउन अर्थमन्त्रीले बनाए अध्ययन समिति

जेन–जी आन्दोलनपछि खुलेको बजारमा लगातार नेगेटिभ सर्किट ब्रेक लागेपछि सरकारले लगानीकर्ताको मनोबल बढाउन तयारी थालेको छ । अर्थमन्त्री रामेश्वर खनालले  पूँजीबजारको समस्या अध्ययन गर्न एक कार्यदल नै गठन गरेका छन् । 

कार्यदललाई आम लगानीकर्ताको मनोबल बढाउन गर्नुपर्ने काम सुझाव दिन भनिएको छ । अर्थमन्त्रीले धितोपत्र बोर्डका कायम मुकायम कार्यकारी निर्देशक रुपेश केसीको संयोजकत्वमा कार्यदल गठन गरेका हुन् ।

कार्यदलमा नेपाल राष्ट्र बैंकका निर्देशक शरण अधिकारी र नेपाल स्टक एक्स्चेन्ज (नेप्से) का कामु कार्यकारी निर्देशक निरञ्जन फुयाँल सदस्य तोकिएका छन् । अर्थ मन्त्रालयका उपसचिव शरद निरौला सदस्यसचिव छन् । 

कार्यदललाई लगानीकर्ताको मनोबल बढाउन तत्काल चाल्नुपर्ने प्रणालीगत तथा प्रक्रियागत सुधारबारे ठोस सुझाव र कार्ययोजना बनाउन भनिएको  छ । ५ दिनभित्र कार्यदलले रिपोर्ट दिनेछ ।