बाढी–पहिरोका कारण ४० जनाको मृत्यु, इलाममा मात्र २८ जनाको ज्यान गयो

अविरल वर्षापछिको बाढी, पहिरोका कारण देशभर ४० जनाको मृत्यु भएको छ, १३ जना बेपत्ता भएका छन् । 

सशस्त्र प्रहरी बलका अनुसार सबैभन्दा धेरै इलाममा २८ जनाको मृत्यु भएको छ । त्यस्तै पाँचथरमा ६, रौतहटमा ३, उदयपुरमा २ र खोटाङमा १ जनाको मृत्यु भएको छ । 

शुक्रबार रातिदेखिको अविरल वर्षापछि आएको बाढी र पहिरोका कारण इलामको माइजोगमाइ गाउँपालिका, इलाम नगरपालिका, सूर्योदय नगरपालिका, मान्सेबुङ गाउँपालिका, देउमाइ नगरपालिका, सन्दकपुर गाउँपालिका र फाकफोकथुम गाउँपालिकामा गरी २८ जनाको मृत्यु भएको छ । 

इलामको माइजोगमाइ गाउँपालिकामा ८, इलाम नगरपालिकामा ६, सूर्योदय नगरपालिकामा ५, मान्सेबुङ गायँपालिकामा ३, देउमाइ नगरपालिकामा २ र फाकफोकथुम गाउँपालिकामा १ जनाको मृत्यु भएको छ । त्यस्तै सन्दकपुर गाउँपालिकामा ३ जनाको मृत्यु भएको सशस्त्र प्रहरी बलका सहायक प्रवक्ता शैलेन्द्र थापाले जानकारी दिए । 

इलाम नगरपालिका–६ घोसमा स्थानीय डम्बरबहादुर तामाङको घर पहिरोले पुरिँदा ६ जनाको मत्यु भएको छ । सूर्योदय नगरपालिका–१ मानेभञ्ज्याङमा स्थानीय राजु क्षेत्रीको घर पहिरोले पुरिँदा ५ जनाको मृत्यु भएको छ ।  

देउमाइ नगरपालिका–५ धुसेनीमा दीपक लिम्बुको घर पहिरोले पुरिँदा २ जनाको मृत्यु भएको छ भने ३ जना बेपत्ता भएका छन् । प्रहरीले एक जनाको सकुशल उद्दार गरेको छ । 

माङसेबुङ गाउँपालिका–५ पाटीगाउँमा मदन लिम्बुको घर पहिरोले पुरिँदा ३ जनाको मृत्यु भएको सशस्त्र प्रहरी बलका सहायब प्रवक्ता शैलेन्द्र थापाले जानकारी दिए ।