गाउँले ढोका थुनेर लुके, प्रहरीको चेतावनीपछि आत्मसमर्पण 

जेनजी आन्दोनका क्रममा गोली ठोक्नुस्, मेरो आँखामा डर छ ? भन्दै प्रहरीसँग मुकाबिला गरिरहेका उनलाई धेरैले साहसी, ‘बहादुर’को संज्ञा दिएका थिए । 

सोेमबार यमबहादुर फेरि चर्चामा छन् । तर कुनै बहादुरी गरेर होइन, जघन्य अपराधका कारण । धारिलो हतियार प्रहार गरी ६३ वर्षकी आमा राममाया कँडेलको हत्या गरेको आरोपमा उनी पक्राउ परेका छन् । 

३० वर्षका यमबहादुर धादिङको त्रिपुरासुन्दरी गाउँपालिका–५ थापाकटेरीका बासिन्दा हुन् । काठमाडौंमा बसोबास गर्ने यमबहादुर दशैं मनाउन फूलपातीको अघिल्लो दिन मात्र घर गएका थिए । 

उनका दुई दाजुहरुमध्ये जेठा फिनल्याण्डमा र माइला पोर्चुगलमा छन् । यमबहादुर भने जाँडरक्सी र लागुऔषधको कुलतमा फसेका थिए । छोरा कुलतमा लागेकामा आमाबाबु चिन्तित थिए ।

असोज १९ गते बाबुआमाबीच छोरालाई ज्योतिष कहाँ हेराउन जाने सल्लाह भएको थियो । घरमा पाहुनाहरु पनि आएका थिए । 

त्यही बेला यमबहादुर तरबार लिएर खडा भए । घरमा पाहुना आएका भान्जामाथि जाइलागे । भान्जा भागेर गाउँकै एक घरमा लुक्न पुगे । त्यसपछि उनले आफ्नै आमालाई तरबार हाने । 

राति ८ बजेतिर आमालाई तरबार हानेपछि बाबुलाई पनि उनले कब्जामा राखे । कतै भागेमा वा गाउँमा कसैलाई खबर गरेमा मारिदिने धम्की दिए । 

थापाकटेरी गाउँमा २०/२५ घरको बसोबास छ । उनको डरले गाउँका कोही पनि मानिसहरु बाहिर निस्केनन् । 

स्थानीयका अनुसार यमबहादुर गाउँमा उछृङ्खल गतिविधिका लागि बदनाम थिए  । यसअघि पनि गाउँमा खुलेआम हतियारसहित हिँडडुल गर्थे । उनीसँग गाउँका सबै मानिसहरु त्राहिमाम हुन्थे । उनकै डरका कारण कसैले पनि उजुरी दिएका थिएनन् । 

जिल्ला प्रहरी कार्यालय धादिङका प्रवक्ता डीएसपी प्रकाश दाहालका अनुसार यमबहादुरको आपराधिक पृष्ठभूमिकै कारण गाउँलेहरु प्रहरीलाई सहयोग गर्न पनि आएनन् । 

असोज १९ गते उनकी आमाको हत्या हुँदा पनि कोही गाउँले उनको घरमा पुग्न सकेका थिएनन् । वडाध्यक्ष सिटौलाका अनुसार गाउँका सबै मानिसहरु ढोका थुनेर लुकेका थिए ।

घरबाट भागेका भान्जाले खबर गरेपछि अस्थायी प्रहरी पोस्ट सल्यानकोटबाट असइको कमाण्डमा प्रहरी टोली घटनास्थलमा गएको थियो । प्रहरीलाई नजिकैको अर्को गाउँका युवाहरुले सहयोगगरेका थिए । 

प्रहरी घटनास्थलमा पुगेपछि पनि यमबहादुरले हतियार चलाउन खोजेका थिए । तर प्रहरीले प्रहरीले हतियार नराखे गोली चलाउने चेतावनी दिएपछि बल्ल उनले आत्मसमर्पण गरे । 

उनी अहिले जिल्ला प्रहरी कार्यालय धादिङको हिरासतमा छन् । उनका बाबु गोपबहादुर कँडेलले सोमबार किटानी जाहेरी दिएका छन् । 

राममायाको शव पोस्टमार्टम गरेर जिल्ला अस्पताल धादिङमा राखिएको छ । 

आमाको काजकिरियाका लागि फिनल्याण्डमा रहेका जेठा छोरा फर्किँदैछन् । मृतक राममायाको अन्त्येष्टि मंगलबार मात्र गरिने वडाध्यक्ष कुशबहादुर सिटौलाले जानकारी दिए ।