सांसद विकास कोषको बजेट दिएवापत प्रदेश सांसदले लिए ४० प्रतिशतसम्म कमिसन

मधेश प्रदेशसभाका एक सांसदले आफ्नो निर्वाचन क्षेत्र विकास कार्यक्रमको बजेट दिएवापत उपभोक्ता समितिबाट ४० प्रतिशतसम्म कमिसन बुझेको फेला परेको छ ।

अख्तियार दुरुपयोग अनुसन्धान आयोगले उपभोक्ता समितिबाट कमिसन बापत ३८ लाख ५० हजार ३१९ रुपैयाँ बुझेको आरोपमा महोत्तरी ४(ख) बाट निर्वाचित प्रदेशसभा सदस्य सरोजकुमार सिंहविरुद्ध भ्रष्टाचार मुद्दा दायर गरेको छ ।

सिंह मधेश सरकारको पूर्व आन्तरिक मामिला तथा कानुनमन्त्रीसमेत हुन् । उनले आफ्नो प्रदेश संसदीय विकास कोषबाट बजेट दिएवापत उपभोक्ता समितिबाट १२ देखि ४० प्रतिशतसम्म कमिसन बुझेको पाइएको अख्तियारको भनाइ छ ।

आर्थिक वर्ष २०७८/७९ को बजेटमा महोत्तरी ४ (ख) को निर्वाचन क्षेत्र विकास कार्यक्रम अन्तर्गत रामगोपालपुर नगरपालिका, मनराशिसवा नगरपालिका र सम्सी गाउँपालिकाका विभिन्न वडाहरुमा विकास योजनाहरु संचालन गर्नको लागि उपभोक्ता समिति गठन भएका थिए ।

सडक, मन्दिर, धर्मशाला निर्माण आदि कामका लागि उपभोक्ता समितिले पाएको बजेटमध्ये औसतमा २८ प्रतिशत रकम प्रदेशसभा सदस्य सिंहको खातामा नै फिर्ता गरेको देखिएको अख्तियार दुरुपयोग अनुसन्धान आयोगका प्रवक्ता राजेन्द्रकुमार पौडेलले जानकारी दिए ।

उनले रधवा पिपलदेखि सहसौलासम्म अनेहरभाट स्थानदेखि जनता  प्रावि हुँदै लक्ष्मीनियाँसम्म माटो ग्राभेल निर्माण उपभोक्ता समितिबाट ४० प्रतिशत कमिसन बुझेको अख्तियारको भनाइ छ ।

यो उपभोक्ता समितिले निर्वाचन क्षेत्र पूर्वाधार विकास कार्यक्रमबाट ४७ लाख २९ हजार ७५० रुपैयाँ बजेट पाएको थियो । जसमध्ये १८ लाख ९१ हजार ९०० रुपैयाँ प्रदेशसभा सदस्य सिंहलाई फिर्ता गरेको अख्तियारको भनाइ  छ ।

निर्वाचन क्षेत्र पूर्वाधार विकास कार्यक्रमका योजना कार्यान्वयन गर्न उपभोक्ता समितिहरुको नाममा लक्ष्मी सनराइज बैंकमा खाता खोलिएको थियो ।

उपभोक्ता समितिको खातामा १ करोड ३६ लाख २७ हजार ४८१ रुपैयाँ जम्मा भएकामा प्रदेशसभा सदस्य सिंह र उनकी पत्नी सरिताकुमारी महतो सिंहको नाममा त्यसै बैंकमा रहेको संयुक्त खातामा ३८ लाख ५० हजार ३१९ रुपैयाँ जम्मा गरेको देखिएको अख्तियारको भनाइ  छ ।

अख्तियारले प्रदेशसभा सदस्य सिंहसँगै उनलाई कमिसन दिने उपभोक्ता समितिका अध्यक्ष र कोषाध्यक्षविरुद्ध पनि भ्रष्टाचार मुद्दा चलाएको छ ।