रोबिन सिंह लुम्बिनी लायन्सको मेन्टर 

काठमाडौं । लुम्बिनी लायन्सले भारतीय प्रशिक्षक रोबिन सिंहलाई मेन्टर नियुक्त गरेको छ । 

नेपाल प्रिमियर लिग (एनपीएल)को दोस्रो संस्करण यही मंसिर १ देखि २७ गतेसम्म आयोजना हुँदैछ । त्यसका लागि लुम्बिनीले सिंहलाई मेन्टरमा नियुक्त गरेको हो । 

६२ वर्षीय रोबिन सिंहसँग प्रशिक्षणको लामो अनुभव छ । उनले आईपीएलमा मुम्बई इन्डियन्स र क्यारेबियन प्रिमियर लिगमा बारबाडोस ट्रिडेन्ट्सको प्रशिक्षण सम्हालिसकेका छन् । 

दुई दशक लामो प्रशिक्षण अनुभव भएको रोबिन सिंहको आगमनले एनपीएलमा टिमले राम्रो नतिजा ल्याउने लुम्बिनी लायन्सको विश्वास छ । टिमका अध्यक्ष ईश्वर जिसी भन्छन् , ‘उहाँको नेतृत्व र योगदानले हाम्रो टिम एकदमै बलियो बन्दैछ र यसले पक्कै पनि हाम्रो लक्ष्यलाई सफलताको उचाईमा पुर्‍याउनेछ ।’

नवनियुक्त मेन्टर रोविन सिंह पनि युवा प्रतिभावान खेलाडीहरुसँग आफ्नो अनुभव बाँड्न उत्सहित छन् । ‘नेपाल प्रिमियर लिगमा लुम्बिनी लायन्सको हिस्सा हुन पाउँदा म अत्यन्त खुशी छु’, उनले भने, ‘नेपालमा क्रिकेट तीव्र गतिमा वृद्धि हुँदैछ र म यहाँका युवा प्रतिभाहरूसँग आफ्नो अनुभव बाँड्दै जित्ने संस्कृतिको निर्माणका लागि योगदान दिन उत्सुक छु । लायन्समा ठूलो सम्भावना छ ।’